Magpaabot pa og siyam ka buwan
ARANGKADA - Leo Lastimosa (The Freeman) - September 7, 2020 - 12:00am

Gisabligan sa World Health Organization (WHO) og bugnawng tubig ang naghigwaos nga mga pahibawo sa kanasuran ug pribadong mga kompaniya sa nag-ung-ong nga pagtugot sa ilang mga kandidato nga bakuna karong semanaha o labing dugay sunod buwan.

Matod sa WHO ang tanang timaan sa 176 ka kandidato nga bakuna nagpakita nga, sukwahi sa sibaw nga mga pangangkon sa mga politiko ug mga negosyante, way mahitabo nga lapad nga pagpamakuna batok sa COVID-19 karong tuiga. Labing sayo nga banabana sa mga siyentipiko sa WHO nga makabuylo ang pamakuna sa nagkalainlaing kanasuran unya na sa Hunyo sa sunod tuig.

 * * *

Wa hisguti sa WHO apan klarong maoy gipuntirya sa ilang pahimatngon ang pamunoan ni US President Donald Trump. Kinsa nipa-andam na sa mga gobernador sa pagsugod sa pagpamakuna karong Nobyembre 1, o duha ka adlaw sa di pa ang piniliayng presidensiyal tali nilang Trump sa Republican Party ug sa nag-una niya sa surveys nga si Joe Biden sa Democratic Party.

Nabalaka ang mga espesyalista sa Estados Unidos ug ubang kanasuran nga lakturon ni Trump ang human trials aron pagpalambo sa iyang kahigayonan nga makadaog og lab-as nga upat ka tuig nga termino.

 * * *

Laing timaan nga nagkaduol nang pagtugot sa bakuna batok sa COVID-19 mao ang pahibawo sa Food and Drug Administration (FDA) sa Estados Unidos nga mahimong mohatag na sila og dinalian nga pagtugot sa usa sa mga bakuna bisan di pa mahuman ang pagtuon.

Bisan si Dr. Anthony Fauci, ang tinahud nga pangu sa National Institute of Allergy and Infectious Diseases, masaligon nga may bakuna nang maaprobahan ang FDA karong Oktubre.

 * * *

Gisalikway ni Fauci ang mga pagduda sa pamolitika sa bakuna. Matod niya kon makapadasig pag-ayo ang pasiunang sangpotanan gitugotan sa mga lagda ang paghunong na sa Phase 3 trials ug pagtugot na sa mga bakuna.

Gipahinumdoman sa WHO ang FDA sa Estados Unidos ug ubang kanasuran sa numero nga kinahanglan nga maoy pasikaran sa pagtugot sa bisan unsang bakuna: Katugotan lang ang pagpamakuna sa mas daghang katawhan kon makaabot og 50%, mas maayo gani kon mas taas pa, ang ka-epektibo sa mga kandidato nga bakuna pagpanalipod sa mga pasyente gikan sa COVID-19.

WHO
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with