Grand Halad ug Magic Sandayong
Kay duha ka semana na man lang ang nahibilin sa among pagsibya sa ABS-CBN Cebu, nangahas ko og sugyot sa mga tigpaminaw ug tigtan-aw nga nahasol sa pagsunod sa alternatibo namong mga plataporma sa Facebook, YouTube, ug Channel 38 sa SkyCable nga tabangan mi nila pagpasiugda og kalihokan sa di pa mi mapawong.
Gipahibawo namo sila nga di ni panamilit. Kay sa kinauyokan nga bahin sa among kasingkasing kami nangaliya ug nisalig nga mahibalik sa kahanginan ang ABS-CBN. Nihangyo mi nila nga isipon lang ni nga kabos namo nga pamilin-bilin.
***
Ginganlan namo ang kalihokan nga “Grand Halad sa Kapamilya,” pasidungog sa kaduha matag tuig nga piyesta sa libreng pangalagad sa niaging 15 ka tuig, diin nag-abot ang katawhan nga labing tabanganan ug katawhan nga may katakos ug kasingkasing sa pagtabang.
Sa samang higayon, kay gidili pa man ang dagkong tapok sama sa Grand Halad, gidapit namo sila sa pagtabang paghimo sa kalihokan nga “Magic Sandayong”, nga ilang kasudlan sa mga butang nga wa na nila gamita uban ang pagsalig nga adto mapahimutang sa kabalayan ug mga pamilya nga labing nagkinahanglan.
***
Nagbaha ang mga mensaheng nitanyag ug nangayo og tabang: May pasyente sa kanser nga nanghangyo og panday ug biyang mga gamit aron matiwas ang iyang payag sa Barangay Sirao; may mga bakwet sa Dakbayan sa Sugbo nga nangayo og mga binhi nga ikasugod og umahan sa Pinamungajan;
May civil engineer nga molibre sa building plans sa mga istrukturang usa ka andana; may dean nga molibre sa webinars sa accounting ug bookkeeping; ug may manghatag og mga tambal, notebooks, textbooks, ug wheelchairs.
***
Ang pasiunang pasundayag sa pagtinabangay wa kaandam namo sa sunod nga mensaheng nadawat: Tag-iya sa lima ka ektaryang bodega, nga puno sa mga butang sama sa hospital beds ug mga gamit sa restaurant, nitanyag nga iyang ihatag namo ang tanan.
Nipasalig ang tagduma paglista sa tanang butang. Busa magpatabang na sab mi unsaon pag-ila ang labing nagkinahanglan ug pag-apud-apod ang tanang kabtangan sa mosunod nga 14 ka adlaw. Apan malipayon ning maong tahas. Ug sa makausa pa napahinumdoman mi pinaagi sa Grand Halad sa Kapamilya nga duna g’yud diay Magic Sandayong.
- Latest
