Way kinutoban nga mga palusot
ARANGKADA - Leo Lastimosa (The Freeman) - August 10, 2020 - 12:00am

Inay angkunon nga may dakong problema ang kampanya sa pamunoan ni Presidente Rodrigo Duterte batok sa COVID-19 tungod sa padayon nga paspas ug lapad nga pagsulbong sa tinakdanay labi na sa Metro Manila ug kasilinganang mga lalawigan, ang Malakanyang di mahutdan og lusot paglubog sa tinuod nga sitwasyon.

May sukaranan ang kabalaka nga di g’yud matapakan ang dagkong buslot sa kampanya kay ang Inter-Agency Task Force (IATF) batok sa COVID-19 nga gidominahan sa retiradong mga heneral di man moangkon nga nagkinahanglan og dinalian nga kausaban ang ilang pagduma sa pandemya.

 * * *

Masihag ang kagahi og ulo sa IATF sa salikwaot nga mga sulti sa ilang tigpamaba nga si Harry Roque:

- Nangangkon og kadaogan kay wa matinuod ang gidaghanon sa mga kaso nga gitakda sa mga eksperto sa University of the Philippines (UP) niadtong Hunyo;

- Dihang nalabwan ang pangagpas sa UP niadtong Hulyo, nipasalig nga di kabalak-an ang pagsulbong sa mga kaso kay gamay rang patay; ug

- Dihang naapsan nang mga kaso sa Indonesia, niinsistir nga tungod ni kay mas daghan ang swab testing sa Pilipinas ug ? rang testing sa Indonesia.

 * * *

Apan di tinuod nga kuwang ang testing sa Indonesia. Duna silay 269 ka molecular laboratories, mas daghan sa atong 99. May laboratoryo na ang tanan nilang 34 ka lalawigan, lahi sa ato nga nahimutang lang sa dagkong mga dakbayan.

Naproblema ang Indonesia kay ang kinabag-an sa testing nahimo sa Java, nga maoy pinuy-anan sa dul-an sa katunga (141 milyones) sa 270 milyones nga nasudnong populasyon. Laing problema sa Indonesia mao nga kinadaghanan sa gi-swab test maong mga nangasakit na.

 * * *

Apan samtang ganahan kaayong motandi sa atong kahimtang sa Indonesia (depektusong testing) ug Singapore (gamay rag populasyon), gilikayan sa Malakanyang ang paghisgot sa Vietnam (mas kabos, susama og populasyon, mas duol sa China ug mas gamay og mga kaso) o sa China (nga 10% rang atong populasyon apan hagbay ra natong naapsan sa gidaghanon sa mga kaso).

Ambot kanus-a pa mohunong ang kadagkoan sa gobyerno pagpangita og lusot sa ilang kapakyas pagbadlong sa kagaw aron nga makasugod na pagpatuman sa tukmang mga lakang nga napamatud-ang epektibo pagkontrolar sa COVID-19 ug pagpangabli pagbalik sa ekonomiya.

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with