Ahat ug lahap nga mga pasalig

Sa way pagpasabot nganong padayong nisulbong ang mga kaso sa COVID-19 bisan nakontrolar na sa ubang kanasuran ang tinakdanay, niluwat ang Malakanyang sa mosunod nga mga pasalig:

• Gitino ni Presidente Rodrigo Duterte nga duna nay bakuna batok sa COVID-19 karong Disyembre;

• Gipasalig ni Finance Secretary Sonny Dominguez nga dunay kuwarta ang Pilipinas nga ipangompra sa bakuna;

• Nibutyag ang presidente nga gipasaligan siya sa kadagkoan sa China nga pa-utangon ta nila og bakuna; ug

• Nisaad ang presidente nga unang bakunahan ang labing kabos nga mga molupyo ug ang kapolisan ug kasundalohan.

 * * *

Samang napamatud-an nga bakak ang nahaunang mga pasalig sa Malakanyang nga nakontrolar nang COVID-19, labawng kadudahan ang ahat ug lahap nilang mga pasalig sa bakuna:

• Way bisan usa sa tulo ka nag-unang kandidato nga bakuna gikan sa Estados Unidos (Moderna), Britanya (Oxford), ug China (Sinovac) nga ni-garantiya nga may bakuna na batok sa COVID-19 karong tuiga; ug

• Bisan pila pay mautang sa Pilipinas aron ipamalit og bakuna, mas daghan og kuwarta ang ubang kanasuran nga mas una nang nakabayad ug nakasud og kontrata sa mga tighimo sa kandidatong mga bakuna.

 * * *

Ang bag-ong pasalig sa presidente nga may bakuna na karong Disyembre nisukwahi sa una niyang pahibawo nga may bakuna nang gi-aprobahan ang Russia. Nga napamatud-an sang bakak kay ang labing masaaron nga kandidato nga bakuna sa Russia wa pa kapasar sa unang hugna sa clinical trials.

Ang sayop nga kasayuran sa bakuna sa Russia giluwatan sa presidente gikan sa Malakanyang niadtong Hulyo 21, dungan sa iyang pangangkon nga malimpiyo ang face masks kon ihumol sa krudo o gasolina.

 * * *

Bisan sa kapaspas sa kalibotanong mga paningkamot pagmugna og bakuna batok sa COVID-19, nipasidaan ang mga eksperto nga sayop ang kanasuran nga nisandig sa bakuna sa ilang kampanya batok sa pandemya.

Nitambag sila nga inay manglaktod ipadayon sa kanasuran ang napamatud-an nang mga panagang sa COVID-19 nga naglakip sa mass testing (nga hangtod karon wa g’yud himoa dinhi sa ato), agresibo nga contact tracing ug pagtambal ug pagbuwag gilayon sa mga masakiton. Matod sa mga eksperto mas mapuslanon ang pagpalambo sa mga tambal nga makaiban sa kagrabe sa sakit ug sa kahigayonan nga mangamatay ang mga pasyente.