16 empleyado ng Kamara, may COVID-19
MANILA, Philippines — Kinumpirma ni House Secretary General Atty. Jose Luis Montales na pumalo na sa 16 ang mga kawani ng Kamara ang nagpositibo sa COVID-19 nang maitala ang dalawang pinakahuling kaso noong Martes.
Sa kaniyang ibinigay na impormasyon, sinabi ni Montales na ang pang-15 kaso ay isang congressional staff na huling pumasok noong July 2 at July 6.
Nakahalubilo naman ng congressional staff sa mga petsang iyon ang kongresista na hindi na pinangalanan at mga kapwa staff nito.
Ang ika-16 naman na kaso ay isang security staff na huling nag-report sa duty noong March 12 at may iniindang sakit sa bato.
Hiniling naman ni Montales ang agarang paggaling ng mga pasyente gayundin ang kalagayan ng kanilang pamilya.
Muling pinaalalahan ni Montales ang lahat lalo na ang mga kawani ng Mababang Kapulungan na magdoble ingat lalo’t mas nahaharap sa mas malaking banta na mahawaan ng COVID-19 ang mga tao bunsod na rin sa pagluwag ng travel restrictions at pagbubukas ng ekonomiya.
- Latest