Mas hawod sa IATF
ARANGKADA - Leo Lastimosa (The Freeman) - July 10, 2020 - 12:00am

Lahi sa ubang lokal nga mga opisyal nga napul-an og hangyo sa Inter-Agency Task Force (IATF) batok sa COVID-19 sa pag-usab sa mga lagda sa ilang mga dakbayan ug kalungsoran aron nga mas gawasnon nang mangabli ang mga negosyo o aron nga mas kapugngan ang pagkatap sa kagaw, si Davao City Mayor Sara Duterte Carpio di pa igo nga nanugo kon dili nanghulga pa g’yud sa kinatas-ang buhatan nga nagduma sa nasudnong kampanya.

Ug ang kadagkoan sa IATF, salamat sa iyang pasidaan, nilibkas sugod karong adlawa sa pagdili sa pagpa-angkas sa mga motorsiklo.

 * * *

Wa manghangyo si Carpio. Iyang giawhag ang IATF sa pag-umol og mga lagda sa pagtugot sa pagpa-angkas sa mga motorsiklo. Ang awhag gipakapinan og pasidaan: Kon way maumol nga lagda ang IATF karong semanaha, siya ang mohimo og lagda.

Inay pahinumdoman nga sila maoy hawod ug pasidan-an si Carpio nga mag-atubang og mga kaso sama sa ubang mga mayor nga nagbuut-buot sa ilang mga hurisdiksiyon, ang mga sakop sa IATF maoy namilok. Ambot kinsay gisaligan ni Carpio nga wa man mahadlok, ang IATF man hinuon ang nikurog niya.

 * * *

Gisagop sa IATF ang dugay nang sugyot ni Gobernador Art Yap sa Bohol nga butangan ang motorsiklo og ali nga may kuptanan tali sa drayber ug angkas aron di magtinakdanay. Apan gihatagan og kagawasan ang mga mayor pagsagop sa ilang kaugalingong mga lagda.

Sukwahi sa pagtuo sa IATF nga pulos taga Metro Manila, hagbay rang gitugotan ang angkas sa mga motorsiklo, apil nang mga habal-habal, sa kalungsoran nga ubos sa General Community Quarantine (GCQ).

 * * *

Abunda ang mga pagtulon-an nga angayng makat-onan sa lokal nga mga opisyal ning kalit nga pagkausab sa lagda sa IATF. Maghisgot lang mi og duha:

• Una, gawas sa pagsugyot og kausaban mas maayo nga sama ni Yap mag-andam silang daan og sampol pagmatuod nga mas maayo ang ilang mga ideya; ug

• Ikaduha, kay kasagaran nabalibaran man ang ilang mga hangyo nga gipadangat ngadto sa kadagkoan sa IATF sa kaulohan, mas mapuslanon tingali kon modiretso sila og palaban ni Carpio sa Mindanao kay, ambot kinsay amahan, bantang nga nipahamtang og ultimatum sa nasudnong gobyerno pagpatuman sa iyang giawhag nga kausaban.

IATF
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with