Lapad nga paggamit sa face masks
ARANGKADA - Leo Lastimosa (The Freeman) - June 7, 2020 - 12:00am

Sa kataposan, human sa pila ka buwan nga pagdumili sa pag-usab sa ilang lagda nga ang health workers ug mga masakiton ray angay nga magsul-ob og face masks taliwa sa kalibotanong hulga sa COVID-19, niangkon na ang World Health Organization (WHO) sa panginahanglan sa publiko sa pag-face mask labi na sa mga dapit nga di mapatuman ang safe distancing.

Nausab ang baruganan sa WHO tungod sa mga pagtuon sa ilang mga eksperto nga nagpakita nga ang face masks makatabang sa pagbadlong sa paspas nga tinakdanay sa makamatay nga sakit.

* * *

Wa hisguti sa WHO nga ang orihinal nilang lagda nga di kinahanglan nga mag-face mask ang katawhan nga way mga timaan sa COVID-19, aron nga di mahikawan sa panagang ang health workers taliwa sa kalibotanong kanihit sa suplay, tungod sa sukwahi nga kasinatian sa mga nasud nga malampusong nibadlong sa kagaw.

Gitumbok sa nagkadaghan nga kanasuran nga wa mosulbong ang ilang mga kaso tungod sa pagsul-ob dayon og face mask sa ilang katawhan. Sa kaso sa Hong Kong, nag-face mask ang 99% sa mga molupyo kay nahiagom sa SARS niadtong 2003.

* * *

Usa sa mga sugyot sa WHO, nga mahimong tamdan sa atong mga opisyal sa Pilipinas, mao nga gikinahanglan ang face masks sa mga sakyanang pamasahero nga di mahimong ipatuman ang safe distancing nga usa ngadto sa duha ka metro tali sa mga pasahero.

Sa ato pa, giila sa WHO nga di kinahanglang inutilon ang mga sakyanang pamasahero sa paghigpit nga katunga ra sa kapasidad ang magamit, nga mosangpot sa pagkatanggong sa mga trabahante ug kalangay sa pagpangabli sa mga negosyo, nga di mameligrong mosulbong ang tinakdanay.

* * *

Naapil sa mga rekomendasyon sa WHO sa mas lapad nga pagsul-ob sa face masks, isip kabahin sa kinatibuk-an nga panagang sa kalibotanong pandemiya, mao ang paggamit sa tulo ka sapaw sa mas tukma nga mga sangkap aron nga mahimong mas epektibo batok sa COVID-19:

• Ang kinailawoman nga sapaw nga modapat sa nawong kinahanglan nga panapton nga motuhop ang basa;

• Ang tungatunga nga sapaw kinahanglan nga polypropylene nga magsilbing tig-ag-ag (filter); ug

• Ang sapaw sa gawas kinahanglan nga synthetic, sama sa polyester, nga di mabasa.

FACE MASK
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with