Gipalabing kasipsip kay sa katakos
Ulug-ulog ra diay tong tanang pasalamat, pasidungog ug pasalig sa suporta sa Department of Health (DOH) alang sa mga doktor, nurses, ug ubang health workers nga giisip nga mga bayani tungod sa pagrisgo sa ilang kahimsog ug kinabuhi sa kampanya batok sa COVID-19.
Kay ning pagsugod sa ika-unom ka buwan sa kalibotanong hulga nabisto nga wa diay natunol silang Health Secretary Francisco Duque III ug kaubanan nga bisan usa ka dako nga hinabang alang sa 32 ka health workers nga nangamatay ug sa mas daghan nga grabeng nangasakit sa COVID-19.
* * *
Ang tiyabaw sa health workers nga kutob ra sa pagarpar ang gobyerno sa pag-atiman nila, nga gipamatud-an sa daghan uyamot nga katuigan sa paglansang sa ilang mga suholan ug benepisyo, wa lang ipasikad sa ulug-ulog sa DOH kon dili, ug labawng mahinungdanon, sa probisyon sa Bayanihan To Heal As One Act nga hatagan silag financial assistance kon mataptan sa COVID-19.
Apan gibungulbungolan sila sa DOH. Maong niabot ang ilang reklamo sa mga senador. Nga nangasuko pagkahibawo nga wa tabangi ang 32 ka health workers nga nangamatay tungod sa COVID-19.
* * *
Sa pagkarakara sa DOH pagpanagang sa tulisok sa mga senador nagkatuiris ang ilang palusot:
• Una, wa mapatuman ang probisyon sa balaod kay wa pay implementing rules and regulations (IRR);
• Ikaduha, dihang gipahinumdoman nga silay angayng mohimo sa IRR, nipasalig nga maghimo dayon og joint administrative order uban sa Department of Budget and Management (DBM) ug Department of Labor and Employment (DOLE);
• Ikatulo, niingon nga wa diay silay kuwarta; ug
• Ikaupat, gitulisok ni Duque ang iyang mga kawani.
* * *
Mao ni labing uwahi sa nagkataas nang listahan sa mga bulilyaso ni Duque. Apan ambot unsay hinungdan sa pagdupa ni Presidente Rodrigo Duterte niya bisan sa sibaw nga awhag nga nagkinahanglan siya og mas takos nga tagduma sa DOH ug pangu sa kampanya batok sa COVID-19.
Sa kataposang panalipod sa presidente ni Duque gahapon nabisto ang hinungdan nganong nagpabilin siya sa gabinete. Gipasabot sa presidente nga niadtong mayor pa siya sa Davao City, dihang giisnab sa kasagaran sa nasudnong mga opisyal, si Duque ray nisugat ug nihangop niya sa tigom sa luhong hotel sa kaulohan.
- Latest
