Mahimong mawa nang COVID-19?

Bisan gisalikway sa mga eksperto sa World Health Organization (WHO) ug ubang kanasuran, di kapugngan ang pagbaha sa mga panghinaot nga tinuod ang pangangkon sa mga doktor sa Italya nga nagkahuyang na ang kagaw nga nisangpot sa COVID-19 ug nga may mga timaan nga mawa ra og iya sama sa SARS ug MERS.

Kay mas gaan nga paminawon ang pangagpas nga mapapas nang kagaw sa mosunod nga mga buwan kay sa pasidaan nga mahimong magbalikbalik nang COVID-19 matag tuig kay peligrong maabtan pa og katuigan ang pagpangita og bakuna.

***

Si Dr. Alberto Zangrillo, pangu sa San Raffaele Hospital sa Milan nga nisaad nga imantala ang sangpotanan sa ilang pagtuon sunod semana, way bisan gamayng pagduda sa ilang nakaplagan sa labing bag-ong mga kaso sa COVID-19:

• 10% na lang ang nahibilin sa kabangis sa kagaw sa bag-o nilang mga pasyente kay sa nitapot sa mga pasyente usa o duha ka buwan ang nilabay;

• Mao ni hinungdan nga wa matinuod ang pasidaan sa pagsulbong sa mga kaso sa Mayo ug naneguro nga way laing pagsulbong sa Hunyo; ug

• Angayng patubagon ang mga opisyal sa gobyerno nga nihadlok sa katawhan ug ni-inutil sa mga ekonomiya sa kanasuran.

  ***

Wa mag-inusara si Zangrillo. Gidasonan siya sa laing Italyanong doktor nga si Dr. Matteo Bassetti, pangu infectious diseases sa San Martino Hospital sa Genoa, kinsa nimatuod sab nga mas huyang nang kagaw karon kon itandi duha ka buwan ang nilabay.

Gisaway ni Zangrillo ang kasagaran sa mga lagda batok sa COVID-19 nga giumol sa mga politiko ug ubang nangangkong eksperto sa way pagkonsulta sa tinuod nga virologists.

***

Paspas hinuong nisalikway sa mga pangangkon ni Zangrillo ang mga eksperto sa ubang kanasuran nga nangangkon nga mas daghang kaso ang ilang gitun-an ug wa silay namatikdan nga paghuyang sa kagaw sa pagkamananakod ug sa kagrabe sa kadaot sa panglawas sa mga pasyente. Nangagpas sila nga nalipat lang si Zangrillo kay:

• Nitidlom nang mga kaso sa Italya ug busa naatiman dayon ang mga pasyente sa wa pa mograbe ang ilang kahimtang; ug

• Ang mas lapad nga COVID-19 testing nakatultol sa mas daghang nataptan nga wa pa mopakita og mga timaan sa sakit.