Pagsalikway sa kabos nga pasahero
ARANGKADA - Leo Lastimosa (The Freeman) - June 2, 2020 - 12:00am

Natinuod ang gikabalak-ang pagkatanggong sa mga trabahante nga gitugotang makabalik sa trabaho sa unang adlaw sa pagpatuman sa general community quarantine (GCQ) sa Cebu City ug Mandaue City. Nalikayan unta ni kon nahatagan pang lokal nga mga opisyal og mas taas nga panahon sa pagpangandam.

Apan kay wa pa man mausab ang pagpagawas sa mga lagda sa Inter-Agency Task Force (IATF) nga kalitkalit, sa way paghisgot nga inat-inat sab, wa kahatagi og igong lugway ang mga mayor sa duha ka dakbayan sa pagtakdo sa gidaghanon sa mga sakyanan ug mga pasahero.

***

Di hinuon makapangangkon ang Department of Transportation (DOTr) ug ang Land Transportation Franchising and Regulatory Board (LTFRB) sa samang kaapiki sa panahon. Kay duna silay kapin sa duha ka buwan sa pagpangandam sa pagbalik sa mga sakyanang pamasahero human sa lockdown sa COVID-19.

Kon naghimo pa sa ilang trabaho, di unta magkarakara ang kadagkoan sa DOTr ug LTFRB karon sa pagpahamtang sa bisan unsa na lang lagda nga masud sa ilang bakukang. Nga inay makatabang nisangpot na hinuon sa wa kinahanglanang paglisudlisod sa mga pasahero ug sa transport groups.

***

Usa sa kuwestiyonableng lagda maong paglista sa ngan ug pinuy-anan sa tanang pasahero alang sa contact tracing kon usa nila mataptan sa COVID-19. Ang mga manakay sa Ayala Center para SM City, nga mahimong makahingpit sa biyahe sud sa lima ka gutlo, magkinahanglan og mas taas nga panahon sa pagpanglista.

Gawas pa, kinsay mosusi sa katinuod sa mga pasahero? Paninglon bang ilang IDs? Kinsay makapugong sa drayber pagbuutbuot sa lista aron mas daghan ang iyang round trips?

***

Labing kuwestiyonable ang makauuwaw nga pagduso sa mga tagduma sa DOTr ug LTFRB sa usa ka pribadong online payment system aron nga di na magtinunolay og kuwarta ang mga pasahero ug mga drayber.

Lisod nang daan ang pagpangita og kasakyan tungod sa mga limitasyon sa GCQ, karon may laing babag ang labing kabos nga mga pasahero: Gipaburot nang daan ang plitehan human mabasiyo ang ilang panudlanan sa niaging kapin sa duha ka buwan, maglaway na lang sa mga sakyanang pamasahero kon wa silay smart phones, ni maka-download sa app sa pinalabing negosyo sa DOTr ug LTFRB.

GCQ
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with