Paggakos sa bag-ong teknolohiya
Wa kinahanglana nga paglisudlisod
Klaro ang mga lagda sa nasudnong gobyerno sa paghimong sayon sa pag-abli sa mga negosyo ug pagbalik sa mga trabahante samtang gipaluagan ang mga lagda nga naghigpit sa kalihokan sa mga molupyo bisan sa mga dakbayan ug kalungsoran nga daghang kaso sa COVID-19.
Human sa kapin sa duha ka buwan nga pagpahunong sa mga industriya ug pagtanggong sa katawhan sa kabalayan, nagpabilin ang hulga sa kagaw, di nang kalahutay ang gobyerno pagpakaon sa labing kabos nga mga pamilya ug busa kinahanglang bangunon ang ekonomiya samtang likayan ang pagsulbong sa tinakdanay.
* * *
Gitataw sa Department of Health ug sa Inter-Agency Task Force nga ang kinakusgan nga panagang batok sa COVID-19 sa mga trabahoan di ang rapid testing nga gipamugos sa pipila ka politiko ug negosyante kon dili ang matinud-anon nga pagpatuman sa mosunod nga minimum health standards:
• Pagsul-ob og face mask o face shield samtang naa sa trabahoan;
• Pagpatuman sa safe distancing nga usa ngadto sa duha ka metro;
• Pagsige og panghunaw ginamit ang sabon ug tubig o alcohol; ug
• Makanunayon nga disinfection sa mga buhatan ug mga planta.
* * *
Gihimo ni Kalihim Eduardo Año sa Department of Interior and Local Government nga mas yano ang mga panginahanglan sa paglusot sa checkpoints sa mga trabahante nga mobalik na sa trabaho: Identification card sa kompaniya; ug certificate of employment.
Apan wa ning kapugong sa mga mayor sa pagpamugos nga mokuha ang mga trabahante og medical certificate gikan sa health officers sa mga lungsod ug dakbayan aron kahatagan og worker’s pass.
* * *
Nisamot ko kahugno sa pagkadungog sa report ni RC Dalaguit de Vela sa Arangkada gahapon nga nagpabiling mingaw ang mga biyahe sa buses sa Sugbo kay di pasakyon ang mga pasahero kon di makapakita sa mosunod:
• Medical certificate gikan sa city o municipal health officers nga wa silay COVID-19, o nakahingpit sa 14 ka adlaw nga quarantine period, o kon nataptan man nag-negatibo og kaduha sa PCR test; ug
• Authority to travel gikan sa kapolisan nga mosangko sa Police Regional Office sa Central Visayas kon ang biyahe molatas sa mga dakbayan ug kalungsoran nga ubos sa buwag nga city ug provincial police offices.
- Latest
