Pagbalanse sa kinabuhi ug kagaw
Hinaot nga makamatngon ang lokal nga mga opisyal nga ang pagbalanse sa panginahanglan sa pag-abli sa mga negosyo ug pagpabalik sa mga trabahante, sa usa ka bahin, ug paglikay sa tinakdanay sa Covid-19 sa mga trabahoan, sa pikas nga bahin, di mapasayon sa ilang wa kinahanglanang mga lagda sa paglisudlisod.
Di mi modason sa mga pagduda nga nagpataka lang sila. Ganahan ming motuo nga nagtinguha gyod sila sa pagpanalipod sa kahimsog sa publiko. Apan mas makaayo sa tanang hingtungdan kon ilang ipatuman inay libuglibugon ang mga lagda sa nasudnong gobyerno.
***
Pananglitan, gitataw sa Department of Interior and Local Government (DILG), nga maoy nagduma sa Philippine National Police (PNP), nga duha ra ka panginahanglan ang ipakita sa mga trabahante sa checkpoints--ilang company ID ug certificate of employment (COE).
Apan may lokal nga mga opisyal nga namugos nga kinahanglang mopakita sab ang mga trabahante og (1) worker’s pass, (2) medical certificate nga luwas sila sa Covid-19 gikan sa health officers sa ilang mga lungsod o dakbayan ug (3) business permit nga magmatuod nga makabalik na sa operasyon ang ilang mga kompaniya.
***
Samang mga opisyal, inay motabang sa mga way kita kay gitak-opan ang mga negosyo sa niaging kapin sa duha ka buwan, nisamot og duot pinaagi sa pagsugo sa mga negosyante pagkuha og special business permit ug paghimo og rapid testing sa tanang trabahante matag 14 ka adlaw.
Mas makatabang ang lokal nga mga opisyal kon tumanon ang minimum health standards sa Department of Health (DOH): Pagsul-ob og face mask, safe distancing ug pagpanghunaw sa sabon ug tubig.
***
Sa di pa mosiyagit ang lokal nga mga opisyal nga duna silay otonomiya ug nga silay hawod sa ilang mga lungsod ug dakbayan, maayo tingali nga ilang dawaton ang mosunod nga pait nga kamatuoran:
Kinahanglang mangabli na sa ekonomiya kay gipanggutom nang katawhan ug di nang kalahutay ang gobyerno pagtabang sa labing kabos nga mga pamilya;
Mahimong magpabilin ang kalibotanong hulga sa Covid-19 hangtod nga may mamugna nga bakuna ug di mahimong inaton ang lockdown sa mosunod pang mga buwan; ug
Napakita sa ubang kanasuran nga mabalanse ang pagpadayon sa ekonomikanhong kalihokan ug pagpanalipod sa kahimsog sa katawhan.
- Latest
