Unsay nalangayan sa hinabang
Kon imong paminawon ang Malakanyang, andam na ang mga hinabang alang sa 18 milyones ka pamilya nga nawad-an og panginabuhi human wa na pagawasa sa ilang kabalayan tungod sa lockdown sa tibuok Luzon ug sa dakong bahin sa Kabisay-an ug Mindanao.
Apan alang sa mga senador way klarong plano ang pamunoan ni Presidente Rodrigo Duterte unsaon pagbatok ang COVID-19 ug pagtabang ang mga naapiki sa lockdown. Ug alang sa mga kongresista ang burukrasya maoy nakapalangay sa kampanya batok sa COVID-19 ug labi na g’yud sa pagtabang sa labing kabos nga mga pamilya.
* * *
Makalipayng kasayuran gikan sa Malakanyang:
l Nahatag na sa Department of Budget and Management ang P100 bilyones, katunga sa kinatibuk-ang hinabang, ngadto sa Department of Social Welfare and Development (DSWD);
l Ang DSWD naka-download na sa Social Amelioration Cards (SAC) ngadto sa local government units (LGUs) aron i-apud-apod ug pasuwatan sa tabanganan nga mga pamilya; ug
l Ang DSWD mosubli sa listahan sa mga pamilyang tabanganan gikan sa LGUs ug mao nay mo-apud-apod sa mga hinabang human masusi ang tukmang gidaghanon sa hinabang nga gikinahanglan sa mga pamilya.
* * *
Mga buslot sa burukrasya nga nakit-an sa mga kongresista, nga di kapasanginlang nanglawgaw, kay pulos mga alyado sa presidente:
l Wa pay LGU nga nakapirma og memorandum of agreement nga gipahamtang sa DSWD nga panginahanglan sa di pa maapud-apod ang mga hinabang sa mga lungsod ug dakbayan;
l Matag tabanganan nga pamilya nagkinahanglan og certification ug endorsement sa barangay kapitan nga kinahanglan pa g’yung dasonan sa city o municipal social welfare officers; ug
l Mahimong maabtan ang DSWD og pila ka buwan, o liwas na sa lockdown, una masubli ang listahan sa 18 milyones ka pamilya.
* * *
Mga sukaranan sa pasangil sa mga senador nga, bisan kapin sa semana nang naaprobahan ang Bayanihan Act, di andam ang Malakanyang paggamit sa dugang gahom ug kuwarta nga gihatag sa special session sa Kongreso:
l Wa pa mahuman ang listahan sa tabanganan nga mga pamilya;
l Wa pay lista ang Malakanyang unsay mga proyekto nga usbon o hunungon aron maggamit ang pundo batok sa COVID-19; ug
l Wa pay lista ang Malakanyang pilay palitong protective gear sa health workers ug tukurong mga tambalanan ug quarantine facilities.
- Latest
