Kundisyon sa utang sa COVID-19
Kon nahibung ka nganong kalit lang naghisgot si Presidente Rodrigo Duterte sa panginahanglan pagpalapad sa testing sa dugang mga pasyente sa COVID-19, wa ka mag-inusara. Kay ang presidente igo rang nipaundayon ni Health Secretary Francisco Duque III nga wa kinahanglana ang mass testing.
Wa badlonga sa presidente ang pag-insistir ni Duque nga ang testing alang lang sa may grabeng mga timaan sa sakit tungod sa kakuwang sa test kits. Dihang nidaghan nang test kits nga hinatag sa ubang kanasuran, nilusot na sab si Duque nga kuwang ang katakos sa mga laboratoryo.
* * *
Akong nahibaw-an nga usa sa nakapakumbinser ni Presidente Duterte sa kadinalian sa panginahanglan sa mass testing mao si Finance Secretary Carlos Dominguez III. Nga di lang maoy pangu sa iyang economic managers kon dili mao ray bugtong sakop sa iyang gabinete nga makasukwahi sa iyang mga baruganan ug iyang tuohan.
Posibleng may labot sab si Dominguez sa pagkawagtang na ni Duque sa liderato sa kinatibuk-ang kampanya batok sa COVID-19. Ug sa mas dagkong papel nga gihuptan na karon sa tulo ka retiradong heneral --silang Delfin Lorenzana, Eduardo Ano, ug Carlito Galvez Jr.
* * *
Apan kinsa may nakahunghong ni Dominguez sa kahigayonang mas daghang Pilipinhon ang matakdan ug mamatay sa COVID-19 kon patuyangan si Duque? Kay samtang malampusong negosyante si Dominguez, wa siya igdungog nga eksperto sa pagduma sa mga epidemiya.
Nakadungog ba lang siya sa gibalikbalik nga tambag sa World Health Organization (WHO)? O nigamit lang sa sentido kumon nga di masulbad ang problema kon di matino unsay problema ug nga usa sa paagi pag-ila sa problema sa COVID-19 maong mass testing?
* * *
Mao ni ang posibleng katin-awan: Si Dominguez ang naghikay sa pagpangutang og $101 bilyones (P5.1 trilyones) gikan sa nagkalainlaing kanasuran alang sa COVID-19. Apan ang World Bank (WB), nga gikaintapan nga di mopa-utang nga way higot, nihimo sa mass testing nga usa sa mga kundisyon sa utang.
Sa ato pa, gibungulbungolan nilang Duque ug sa atong gobyerno ang tinarung nga tambag sa WHO ug ubang mga eksperto. Apan napugos lang sa paglusad og mass testing aron nga pautangon sa WB. Hinaot nga nakumbinser sab sila nga makaayo sab ni sa katawhan.
- Latest
