Karakara sa passes sa lockdown
Dihang nagyagaw ang mga pangutana unsaon pagkuha og quarantine passes nga motugot sa usa ka sakop sa pamilya nga mogawas sa bay aron pagpalit og pagkaon ug ubang batakang mga panginahanglan atol sa pagpatuman sa enhanced community quarantine sa hapit tanang lungsod, dakbayan, ug lalawigan sa Pilipinas, wa mi mahasol sa akong asawa.
Kay doktora man siya ug sakop man ko sa media, gawasnon ming duha nga makagawas sa bay aron pagtuman sa among mga trabaho. Mao nga wa ming kabantay sa kabalaka sa among mga silingan nga matanggong sa kabalayan.
***
Akong nahibaw-an sa akong mga higala sa kabaranggayan sa among lungsod sa Consolacion nga nahatagan na sila og quarantine passes niadto pang Huwebes. Samtang kisaw ang ubang lokal nga mga opisyal, si Consolacion Mayor Joyjoy Alegado hilom ra diayng nipalihug sa mga barangay kapitan sa pagpangandam na sa nag-ung-ong nga lockdown sa tibuok probinsiya.
Duha ka passes ang gi-apud-apod sa kabalayan: Quarantine pass alang sa usa ka sakop sa pamilya; ug border pass alang sa mga sakop sa pamilya nga nagtrabaho sa gawas sa Consolacion sa mga kompaniya nga gitugotang mangabli.
***
Mao ni ang problema sa among mga silingan: Ang among subdivision nahimutang sa utlanan sa mga barangay sa Casili, Poblacion Occidental, Polpogan, ug Tolotolo; wa ming kaseguro asa ang mga utlanan sa upat ka barangay ug unsang barangay ang nahimutangan sa among mga pinuy-anan.
Hasta ang mga kapitan sa upat ka barangay wa makaseguro ila ba ming mga molupyo. Maong nagpalaban ming Mayor Joyjoy.
***
Kinsa nitahas sa Casili nga maoy mohatag sa among quarantine passes. Apan way bisan usa namo nga nalista sa barangay hall. Busa sa di pa mi mahatagan og passes, kinahanglang ma-rehistro una pinaagi sa Records of Barangay Inhabitants (RBI) form nga kinahanglang pirmahan sa matag sakop sa among mga pamilya. Ang mga mangayo og border passes kinahanglan sang mosumiter og certificate of employment o, kay apiki na man, company ID.
Hinaot nga may igo pang lugway sa pagtuman sa mga panginahanglan sa di pa magsugod ang lockdown karong Lunes. Kay nabalaka ko nga di ang amo rang mga silingan ang nakalitan sa kalisod diay sa pagkuha og passes.
- Latest
