Talawan ug di diay kublan

Di diay tinuod ang gipatuo ni Presidente Rodrigo Duterte nga way makabadlong niya, bisan sa gipasangil nga laktod nga pagpamatay, apil na sa mga inosenteng mga bata, sa kampanya batok sa ilegal nga drugas ug pagpanggukod sa giisip nga mga kaatbang sa iyang pamunoan, kay di siya makiha tungod sa iyang presidential immunity ug di siya mapugngan sa ubang kanasuran ug kalibotanong mga institusyon tungod sa atong nasudnong sobereniya.

Inanayng nitumaw sa nangaging mga adlaw nga gawas nga mahimo diay siya nga madutlan, mahimo pa g’yud gani diay siya nga masilotan.

* * *

Human niya palayasa ang Amerikanhong mga sundawo (nga wa tumana sa iyang kaugalingong mga heneral) ug pakigsuod ni US president Donald Trump (nga nibawos og ulug-ulog nga siyay Frank Sinatra sa Pilipinas), mahimong silotan sa Estados Unidos ang presidente ug ang iyang mga sinaligan.

Tungod sa balaod nga gipasar sa Amerikanhong Kongreso ug gipirmahan ni Trump ubos sa Global Magnitsky Act, mahimong di makasud silang Presidente Duterte ug kaubanan ug magapos pa g’yung ilang katigayonan sa Estados Unidos tungod sa extrajudicial killings ug pagpabilanggo ni Senador Leila de Lima.

* * *

Bisan nigawas na sa International Criminal Court (ICC) ang iyang pamunoan ug bisan nibakwi na sa kaso ang usa sa mga abogado nga nipasangil ni Presidente Duterte og crimes against humanity, niinsistir si ICC chief prosecutor Fatou Bensouda nga di mahunong ang pasiunang imbestigasyon sa mga pasangil.

Gipaabot nga ipahibawo nang Bensouda karong tuiga may sukaranan bang mga pasangil ug angay bang sugdan ang sunod nga hugna sa imbestigasyon nga mahimong maglakip na sa pagpadakop sa sinumbong.

* * *

Sa niaging semana sab, gipamatud-an sa atong silingang nasud sa Indonesia nga di inutil ang mas gagmayng nasud atubangan sa mga pagpanghasi sa higanteng nasud sa China. Nagpada og mga barko ug mga ayroplanong iggugubat ug si Presidente Joko Widodo niduaw sa gihilabtan nilang mga isla sa Natuna.

Sukwahi sa pasidaan ni Presidente Duterte nga bombahan og armas nukleyar sa China si bisan kinsang nasud nga mangahas pagsukol nila, nisibog ang mga barko sa coast guard sa China tungod sa kaisog sa Indonesia. Hasta ang pagtakoban ni Presidente Duterte sa iyang katalawan batok sa China nahukas na.