30th Southeast Asian Games
Kampeyon ang Pilipinas sa 30th Southeast Asian Games (SEAG) sa ikaduha pa lang nga higayon 14 ka tuig human sa kataposang pagpanghawod niadtong 2005 ug wa makawang ang pangaliya sa katawhan nga mapakita sa Pilipinhong mga atleta ang kinakusgan nilang labok sa atong kaugalingong nataran.
Ang pagsugod og baha sa mga medalya sa unang adlaw pa lang sa panagtigi nilubong sa sibaw nga mga pagsaway sa pasiuna nga mga bulilyaso sa mga tigpasiugda sa pag-atiman sa nangabot nga mga atleta gikan sa kasilingang kanasuran. Nipatigbabaw ang kahinangop sa katawhan sa talagsaong pasundayag sa talagsaong katakos sa mga atleta sa nagkalainlaing natad.
***
Apan di mapapas sa nasudnong kasaulogan ang mga pangutana nasubay ba sa mga lagda ang paggasto sa P17 bilyones nga kinatibuk-ang gahin sa pagduma sa Pilipinas sa SEAG karong tuiga.
Samtang nagpangikog nga nipahibawo ang mga senador nga liwas na sa SEAG sila magsugod og imbestigar sa mga pasangil sa kahiwian, nakabuylo na ang buhatan sa Ombudsman. Gipahibawo ni Ombudsman Samuel Martires nga giapil nila og imbestigar ang Philippine SEA Games Organizing Committee (PHISGOC) bisan kon pribado ug ang pangu nga si House Speaker Alan Peter Cayetano bisan gi-absuwelto nang Presidente Duterte.
***
Gidudahan si Martires nga magsige og dupa sa gikuwestiyon nga mga transaksiyon sa pamunoan isip pasalamat sa iyang pagkatudlo sa katungdanan. Apan nipakita siya og pasiunang timaan sa pagka independente dihang iyang gibasura ang kaso batok ni kanhi Presidente Noynoy Aquino sa masaker sa Mamasapano.
Gipanghinaot nga iyang panig-ingnan ang retiradong mahistrado sa Korte Suprema nga si Antonio Carpio nga nisukwahi sa nagtudlo niya nga si kanhi Presidente Gloria Macapagal-Arroyo. O sa retiradong heneral nga si Benjamin Magalong nga nikiha ni Aquino nga maoy nisugo niya pag-imbestigar sa engkuwentro sa Mamasapano.
***
Mahimo hinuong ginamit ang kadaogan sa SEAG mapahilom ni Cayetano ang tanang pagduda sa pagkontrolar niya ug iyang mga sinaligan sa dakong bahin sa pundo. Mahimo sang tinuod ang pagduda sa kaligdong ni Martires ug ulug-ulog ra diayng pakisusi.
Apan di ang Ombudsman maoy unang nibutyag sa kadudahang mga lakang sa PHISGOC. Ug ang pag-abiba sa katawhan sa pagpakayab sa mga atleta sa atong nasudnong bandila di makapugong sa ilang padayong pagpakabana.
- Latest
