Pagbutangbutang og sakit
Mora ming gisilotan gahapon nga nimata og sayo aron pagpaubos sa tinuig nga pakisusi sa kahimtang sa among panglawas. Laboratoryo sa Consolacion ang napilian sa among kompaniya maong nagbaktas ra ko gikan sa among bay. Pipila ra ang mga pasyente maong alas-7 pa lang nahuman na mi.
Apan wa pay doktor nga mosusi sa among presyon sa dugo ug ubang timaan sa posibleng mga sakit. Gipabalik mi sa mga kawani kay alas-11 pa moabot ang doktor. Gihunghongan ko sa guwardiya nga alas-11:30 na mobalik kay kasagaran moabot ang doktor og alas-11:45.
***
Udtong tutok na kong nakabalik tungod sa kahuot sa trapiko. Wa pa ang doktor. Mas daghan nang mga pasyente ang nagpaabot. Wa magdugay, niabot ang doktor ug nagsugod dayon pag-atiman sa mga pasyente sa iyang klinika. Kay ikatulo man ko sa listahan, di kaayo dugay ang akong paghuwat.
Ambot tungod ba kaha sa kadaghan sa mga pasyente nga iyang atimanunon, o mao g’yuy iyang naandan, dako kaayong tingog sa doktora. Ambot sa ubang pasyente, akong nabatyagan nga mora ming sad-an nga iyang gisukitsukit aron motug-an sa among mga atraso.
***
Nisumbong ko sa akong asawa nga doktora pag-uli na nako sa bay. Igo lang ko niyang giingnan nga nagdali lang tingali ang doktora pagkuha sa among medical history apan makatabang kon di mangisog sa iyang pinangutan-an.
Akong nahibaw-an nga gawas sa doktora nga moatubang sa mga pasyente, ang mga laboratoryo nikontrata og mga espesyalista nga motingob pagbasa sa tanang laboratory results. Maong gawas sa pagpaningka sa pasyente makahimo ang mga doktor og mas seryusong kasaypanan.
***
Uban nakong higalang mga doktor kadaghan na nakasawo og mga pasyente tungod sa mga sayop sa mga laboratoryo. May mga seryuso og sakit nga wa makit-i. Apan may mga pasyente sang gibutang- butangan og sakit.
Nga maoy nahitabo nako dihang gikontrata sa among kompaniya ang samang laboratoryo sa Mandaue. Gipasanginlan ko nila nga “unfit to work.” Maong nipalta ko sa trabaho og pila ka adlaw ug nagpahiling og espesyalista nga nipasalig nga way problema ang akong baga. Apan naikog sa akong mga kauban sa trabaho. Makapaningil ba og danyos ang mga pasyente nga singkahan ug butang-butangan og sakit?
- Latest
