Eksperimento sa habal-habal
Sa hapit na mahuman nga unom ka buwan nga eksperimento pagsusi luwas ug panahon na ba g’yud nga legalisahon ang mga motorsiklo nga mamasahero, ang gitugotan ra sa Department of Transportation (DOTr) mao ra ang mga motorsiklo nga rehistrado sa online application.
Sa laing pagkasulti, ang Angkas Riders ray makapahimus sa test run nga gisugdan niadtong Hunyo ug matapos na karong buwana. Gani, gitugyan man sa DOTr ngadto sa Angkas sa pagduma sa bansaybansay sa mga drayber ug paghukom makapamasahero ba sila o dili. Apan lahi ang aktuwal nga nahitabo.
***
Ang eksperimento nipasulbong sa operasyon sa habal-habal sa mga barangay sa bukid ug sa patag. Kay ang pagtugot sa DOTr sa Angkas gihubad sa kasagaran sa mga drayber sa motorsiklo nga pagdasig nila pag-apil sa eksperimento.
Nga nakapahunong sab sa tanang kampanya sa pagsikop sa mga habal-habal sa lokal ug nasudnong mga buhatan sa kagamhanan. Ang panagana sa mga mayor sa paggukod sa mga habal-habal sa wa pa ang ekspertimento nanakod sa nasudnong mga buhatan nga tokar-tokar na sab hinuong daan nga nanakop. Unsa may mahitabo human sa eksperimento?
***
Gitakda nga moluwat og mga rekomendasyon ang technical working group nga giumol sa DOTr sa pagdokumento unsa kaluwas ang operasyon sa mga motorsiklong namasahero, unsa kadisiplinado ang mga drayber, ug unsa kamapuslanon ang mga habal-habal.
Pinasikad sa sangpotanan sa eksperimento, mohimo og mga rekomendasyon ang DOTr ngadto sa mga senador ug mga kongresista angay bang ipasar ang nag-ung-ong nga mga balaudnon sa paglegalisar sa mga habal-habal.
***
Di maglisod ang DOTr sa pagdokumento kon nadugangan o naibanan ang mga aksidente nga naglambigit sa mga habal-habal atol sa tunga sa tuig nga eksperimento. Lisod pamatud-an sa mga dokumento, apan matapakan pinaagi sa komprehensibo nga survey, ang pangangkon sa mga pasahero nga mas paspas silang niabot sa ilang mga destinasyon tungod sa habal-habal.
Moinsistir ba gihapon ang taga DOTr sa kamakiangayon sa 55 anyos nang balaod nga nagdili sa mga motorsiklo sa pagpamasahero? O moangkon na lang nga, sa way paghisgot sa nagkagrabe nga kahuot sa trapiko, ang kapakyas sa mga buhatan sa kagamhanan pagbadlong sa mga habal-habal maoy di malalis nga ebidensiya sa ilang kamapuslanon?
- Latest
