Pagsalikway sa taga lalawigan

Naabtan og pila ka tuig ang PAGASA ug PHIVOLCS una naminaw sa mga sugyot nga mohatag sila og dugang mga detalye sa mga dapit nga mahimong maigo sa umaabot nga bagyo o sa mga dapit nga labing duol sa linog nga bag-o lang nabatyagan.

Gihunong na nila karong bag-o ang paghingan lang sa lalawigan o labing dagkong mga dakbayan sa way pag-ila sa mas duol nga mga lungsod nga sayon rang matultolan kon subayon lang ang mapa. Apan nasihag gihapon ang ilang kakuwangan sa bulletins sa bagyong Tisoy.

* * *

Una nilang gipaubos sa Signal No. 1 ang amihanang Sugbo apil nang isla sa Camotes. Nakatultol ta sa Camotes apan naglibog unsang bahina sa amihanan ang ilang giapil, ang tumoy ba lang o ang kinatibuk-an hangtod sa Mandaue City ug Lapu-Lapu City?

Sa sunod nilang bulletin, ginganlan na ang tanang lungsod ug dakbayan sa amihanan gikan sa Daanbantayan paingon sa Danao City. Apan inay ganiron segun sa ilang nahimutangan, gi-alphabetical sa paglista ang mga dapit, nga ang mga lungsod sa mga isla sa Camotes ug Bantayan naipon sa mainland.

* * *

Sa sunod pa g’yung bulletin, giganid nang mga dapit sa amihanang Sugbo agad sa nahimutangan sa mapa. Apan nabisto nga nagbuut-buot ra paglista sa mga dapit sa way pagpangutana sa mga nasuhito sa Sugbo sama sa ilang mga kawani sa Mactan.

Maong gilista pag-apil ang Balamban nga kabahin sa Metro Cebu. Sa sunod na sang bulletin, gipuno pa g’yud ang Pinamungajan. Wa katabang ang ilang tigbasa sa ulohang buhatan nga nagpataka og litok sa Bogo ug Minglanilla.

* * *

May weather forecasts na sa Kabisay-an ug ubang mga rehiyon nga gihubad sa lokal nga pinulongan. Nga dugay nang sugyot ni Oscar Tabada, ang retiradong direktor sa PAGASA sa Kabisay-an. Napatuman tuod sa wa pa moretiro si Tabada apan klarong gikopya ra sa main forecast nga hinimo sa ulohang buhatan.

Mas daghang ikasulti silang Engr. Al Quiblat ug kaubanan sa PAGASA Mactan kon pangayoan og katin-awan sa media. Klarong wa pa masulbad ang problemang gireklamohan ni Tabada sukad pa sa una: Pag-insistir sa ilang ulohang buhatan pagbanabana sa panahon sa way pagpaminaw sa ilang mga kawani sa mga lalawigan.