Pag-agi ni Tisoy sa Amihanang Sugbo

Tungod sa nagkaduol nga bagyong Tisoy, nipasidaan ang PAGASA nga magsugod nang uwan dinhi sa Sugbo karong adlawa human nila ipaubos sa Signal No. 1 ang isla sa Camotes sugod sa alas-5 gahapon sa kadlawon ug ang amihang Sugbo sugod sa alas-11 gahapon sa buntag.

Atubangan sa naandang reklamo sa mga molupyo nga siga pa kaayong adlaw dihang giisa ang Signal No. 1 ug gigakotang mga barko gikan ug padung sa Sugbo ug silangang Kabisay-an, nisubli pagpasabot ang PAGASA nga igo lang nilang gipaandam ang mga molupyo nga mahimong maagian sa bagyo 36 ka oras human sa pag-isa sa signal.

* * *

Wa nay naghisgot sa kahigayonan nga mahimong super typhoon si Tisoy. Kay wa pa gani siya makatugpa sa yuta (nga gitakdang mahitabo sa Bicol karong gabii), nihinay na ang haguros sa iyang hangin --gikan sa 150 ngadto sa 185 ka kilometro matag takna gahapon sa kadlawon ngadto na lang sa 140 ngadto sa 170 ka kilometro matag takna gahapon sa udto.

Gipasabot sa PAGASA nga nakatabang pagpahinay og diyutay sa bagyo ang bugnawng hanging Amihan (nga hinaot makapatidlom na g’yud sa temperatura sa Sugbo ug Kabisay-an karong semanaha) nga ni-alkontra sa kainit sa kadagatan nga nipasutoy ni Tisoy sa nangaging mga adlaw.

* * *

Kinadul-an sa amihanang Sugbo si Tisoy karong hapon. Mahiagom og hangin nga 30 ngadto sa 60 ka kilometro matag takna ang Bantayan, Madridejos ug Sta. Fe sa isla sa Bantayan, San Francisco, Pilar, Poro, ug Tudela sa isla sa Camotes, Daanbantayan, Medellin, Bogo City, San Remegio, Tabogon, Tabuelan, Borbon, Sogod, Tuburan, Catmon, Carmen, Asturias, ug Danao City.

Mas duol sa kabangis ni Tisoy ang Leyte, Biliran, Southern Leyte, ug mga lalawigan sa Samar.

* * *

Dinhi sa Sugbo ug kasilinganang mga isla, magkadaghan ang mga pasahero ug mga kargamento nga matanggong sa mga pantalan samtang kusog pang hangin ug dagko pang bawod sa mga dapit nga maagian sa bagyo. Didto sa Luzon, maapil og kahulga sa bagyo ang mga atleta sa 11 ka nasud sa nagpadayong 30th Southeast Asian Games.

Nipaspas hinuon ang pag-irog ni Tisoy paingon sa kasadpang bahin sa nasud. Gitakda siyang mogawas na sa Philippine Area of Responsibility karong Biyernes.