Di na mopid-ok nga kaamguhan
Usa sa labing bililhong pagtulon-an nga nakat-onan ni Dr. Jose "Sir Dodong" Gullas gikan sa bantogan niyang amahan nga si Dr. Vicente Gullas mao nga ang toothpaste nga gipalugwa na sa sudlanan lisod nang ibalik.
Mao ni sukaranan sa mga nagtuo nga bisan gitaktak si Bise Presidente Leni Robredo human lang sa duha ka semana isip bag-ong tagduma sa kampanya batok sa ilegal nga drugas di na magpabilin nga mao lang gihapon ang labing dakong gubat nga gilusad sa pamunoan ni Presidente Rodrigo Duterte nga nikalas na og kaliboan ka kinabuhi.
***
Kon wa kaandam si Presidente Duterte sa wa paabuta nga pagdawat ni Robredo bisan way klaro ang iyang gahom ug gimbuhaton isip co-chairperson sa Interagency Committee on Anti-Illegal Drugs (ICAD), mahimong mas nakugang siya sa kaisog ug determinasyon ni Robredo human gipalagpot.
Ang Malakanyang maoy labing nabalaka unsay mga ibutyag ni Robredo ngadto sa katawhan sa mosunod nga mga adlaw. Unsa may kasayuran nga iyang nahipos gikan sa 21 ka buhatan nga sakop sa ICAD sa wa pa kahunahuna ang presidente nga di diay siya angay’ng kumpiyansahan?
***
Mahimong ang mosunod nga mga sulti ni Robredo di na sama kabug-at sa siya pay giila sa presidente nga drug czar (bisan wa motakdo sa papel ug sa aktuwal nga puwesto).
Apan ang naandang mga insulto ug pakauwaw gikan sa presidente di makapawong sa kasibot sa katawhan unsay nalilian ni Robredo sa kampanya, tingali mas makapasabot nganong nisamot ang drugas human sa kapin sa tulo ka tuig, ug unsa kamakiangayon ang iyang isugyot untang kausaban kon wa pa taktaka.
***
Ang nitumaw nga mas lisod nang pa-uk-ukon pagbalik mao ang kaamgo sa katawhan, tungod sa pagkumpisal sa presidente nga napakyas siya ug sa iyang paghagit ni Robredo pagmatuod nga mas takos siya pagsumpo sa drugas, nga sama sa nahaunang kasinatian sa ubang kanasuran nahimong sayop ang hingpit nga gubat.
Daghang salamat sa gamay’ng gingi nga gi-ukban ni Robredo, andam nang katawhan nga mosuway sa mas makitawhanon nga sulbad. Nga moluwas inay mopatay sa mga biktima sa drugas. Ug nga motutok paghipos sa higanteng mga iho nga tinubdan sa shabu inay sa pagdaginot sa gamitoy nga mga tambasakan.
- Latest
