Panaugdaog sa mga mag-uuma
Gisayonan lang ang pipila ka politiko ug mga opisyal sa gobyerno sa kinabuhi sa mga mag-uuma. Dihang nitidlom ang produksiyon sa agrikultura sa nangaging katuigan, sayon kaayo nilang gitulisok ang mga mag-uuma--kakuwang nila og kakugi, pagdumili pagsagop sa bag-ong mga teknolohiya sa panguma ug pagbiya sa mga batan-on gikan sa umahan sa katiguwangan.
Way bisan usa nila nga nagtagad pagpangutana sa mga mag-uuma. Maong ang mga programa nga giisip sa gobyernong makatabang nila, nga sa tinuod lang mas daghang sulti kay sa napatuman, nisangpot na hinuon sa mas apiki nilang kahimtang.
***
Hinaot nga ang pagtuon sa National Economic and Development Authority (NEDA) nga nisubay sa tinuod nga mga hinungdan sa pagbiya sa minilyon ka mag-uuma gikan sa mga umahan sa 15 sa 17 ka rehiyon sa nasud makapapugwat sa mga politiko ug mga opisyal sa gobyerno sa dakong inhustisya nga ilang nahimo batok sa mga mag-uuma.
Nakaplagan sa NEDA nga nibiya ang mga mag-uuma di tungod sa katapolan ni sa ka-ignorante kon dili tungod kay ang kita sa panguma gawas nga labihan kagamay mapilde pa g’yud sa bisan unsang katalagman.
***
Kay nahurot ang panahon pagbasol sa mga mag-uuma, ang mga tagduma sa gobyerno wa kabantay sa mas daghang tudlo ang nagtulisok nila:
•Silay nagtugot paghimo sa labing tabunok nga mga umahan nga subdivisions, golf courses, ug mga pabrika;
•Silay naglansang sa di tawhanong suholan sa mga nag-ugmad sa umahan pinaagi sa regional wage boards; ug
•Way klarong gisaad nga mga hinabang (wa pay bisan usa ka dako nga nadawat ang mga mag-uuma sa P10 bilyones nga Rice Competitiveness Enhancement Fund).
***
Labing uwahing tunok sa kalbaryo sa mga mag-uuma ang Rice Tarrification Law. Tungod sa pagbaha sa imported nga commercial rice sa kamerkadohan, bisan wa matinuod ang gipasalig nga pag-ubos sa presyo og P7-P10 matag kilo, nitibugsok sa yuta ang presyo sa ilang aning tipasi.
Kay di man kalalis, ang mga mag-uuma napugos sa pagpamasahero og habalhabal, pagpanrabaho sa konstruksiyon o pagpa-buwan. Bantay lang g’yud ning gobyernoha kon makaplagan pagbalik sa tinuod nga mga bayani ning nasura ang ilang tingog ug kaisog sa pagbarug ug pakigbisog alang sa makiangayon nga mga interes sa ilang hut-ong.
- Latest
