Tinuyo nga pagtago sa ASF
Sukwahi sa pangangkon sa Department of Agriculture (DA) nga nakontrolar nang African Swine Fever (ASF) sa Luzon gawas sa duha na lang ka dapit nga sama sa naandan di nila nganlan, gitaho nila sa World Organization for Animal Health (OIE) nga wa pay bisan usa sa 40 ka outbreaks sa Central Luzon ug tulo na ka dakbayan sa Metro Manila nga nabadlong.
Kon unsa kaabunda ang mga detalye sa sinemana nilang report sa OIE mao sab kanihit ang kasayuran nga gihatag ni Agriculture Secretary William Dar ngadto sa katawhan.
* * *
Posibleng katin-awan sa managlahi nga kasayuran sa ASF nga nahibaw-an sa katawhang Pilipinhon ug sa nadawat sa OIE (ang nagbase sa Pransiya nga kahugpongan sa kanasuran sa pagpanalipod sa kahimsog sa mga hayop) mao nga di si Dar ang naghimo sa opisyal nga taho sa Pilipinas ngadto sa OIE. Ang mas matinud-anon nga mga taho gipada nilang:
• Dr. Ronnie Domingo, Officer-In-Charge ug Chief Veterinary Officer sa Bureau of Animal Industry (BAI) ubos sa buhatan ni Dar sa DA; ug
• Dr. Enrico Garzon, Assistant Secretary for Livestock sa BAI ug sa DA.
* * *
Laing makahasol nga kalainan sa mga pahibawo ni Dar dinhi sa ato ug sa kasayuran nga ilang gihatag sa OIE: Samtang nangangkon si Dar nga ang kagaw sa ASF nga nakatakod sa Pilipinas nasubay na ngadto sa pinayuhot nga mga karneng baboy gikan sa China, ang ilang taho sa OIE nangangkon nga padayon pang gisubay sa gigikanan sa kagaw:
• Pagsagol og karneng baboy nga may ASF sa mga lawog sa naigo nga mga baboyan; ug
• Ilegal nga pagpagawas sa mga baboy gikan sa ASF areas.
* * *
Sukwahi sab sa pangangkon ni Dar nga natino ang presensiya sa ASF sa Pilipinas niadto lang Septiyembre ning tuiga, gitaho sa BAI ngadto sa OIE ang mas sayo nga pagkatap sa kagaw:
• Nangamatay ang mga baboy tungod sa ASF sa pito ka dapit sa lalawigan sa Rizal niadtong Hulyo 25, 2019;
• Natino sa laboratoryo sa BAI ang ASF niadtong Agosto 15, 2019;
• Gidasonan sa laboratoryo sa Britanya ang ASF niadtong Agosto 30, 2019; apan
• Gitaho sa BAI sa OIE ang mga kaso sa ASF niadto nang Septiyembre 9, 2019.
- Latest
