MCWD na lay nahibilin
Ang Metropolitan Cebu Water District (MCWD) mao na lang ang nahibilin sa labing dagkong water districts sa nasud nga gipanag-iya pa sa gobyerno. Ang uban, labi nang iyang mga silingan dinhi sa Kabisay-an, hagbay rang natukob sa pribadong mga negosyante.
May sukaranan ang kabalaka nga hapit na mahingpit ang privatization sa MCWD. Nga di angay’ng hangpon sa mga konsumidor. Kay kasagaran sa water districts nga nailog sa pribadong mga negosyante igo lang nipausbaw sa bayranan ug nanaktak sa mga kawani, wa g’yud magtagad sa pagpalambo sa ilang suplay ug serbisyo.
***
Gikahadlokang mosangpot na sa privatization ang pagkontrata sa MCWD sa consortium sa Manila Water Company, Inc. sa Ayala Corp., Metro Pacific Water Investments Corp. ni Manny Pangilinan ug Vicsal Development Company, Inc. sa mga Gaisano sa Sugbo sa pagsuplay og 35 milyones ka litrong tubig matag adlaw.
Apan gituohang nabaraw tungod sa pagsupak sa unyon sa mga kawani ug sa pagdapig sa Korte Suprema sa padayong pagkontrolar sa Cebu City ug pagbasura sa petisyon sa Kapitolyo pag-ilog sa gahom pagtudlo sa mga sakop sa Board of Directors sa MCWD.
***
Samtang napakyas sa Sugbo, nilampos ang kompaniya ni Pangilinan, MetroPac Water Investments Corp., pagbanos sa operasyon sa Dumaguete City Water District (DCWD) uban ang saad pagbubo og P1.62 bilyones. Ikabangga nilang Prime Water ni kanhi Senador Manny Villar nga mas unang gikontrata sa Dumaguete pagtukod og P1.8 bilyones nga water system.
Pribado sang mga kompaniya ang nagduma sa water system sa Tagbilaran ug silingang mga lungsod sa Bohol: Salcon Consortium nga gipangulohan ni Dennis Villareal; ug Richli Corp. ni Richard Lim Sr.
***
Ang Prime Water Infrastructure Corp. ni Villar nibanos sa niaging buwan sa operasyon sa Leyte Metropolitan Water District (LMWD) sa Tacloban City uban ang saad nga P6 bilyones pagpalambo sa water system. Ang MetroPac ni Pangilinan dunay 25 ka tuig nga joint venture uban sa Metro Iloilo Water District (MIWD). Kon mahupay ang mga protesta, gitakdang mobanos sab ang MetroPac pagbanos sa Bacolod City Water District (Baciwa).
Mas lisod ang pagpatuman sa MCWD sa iyang mga proyekto pagpalambo sa suplay sa Metro Cebu. Kon ang mga politiko mahimo nang ahente sa mga negosyante.
- Latest
