Paglawog sa tirong sa MCWD
ARANGKADA - Leo Lastimosa (The Freeman) - October 19, 2019 - 12:00am

Ang tinuod nga tuyo sa lahugay sa liderato sa Metro Cebu Water District (MCWD), usa sa 500 ka water districts sa tibuok Pilipinas, mao ang paglawog ini ngadto sa higante nga pribadong kompaniya. Kon mahinayon, mapuno sa 71 nga nahibaw-an ni Kongresista Ferdinand Gaite sa Bayan Muna nga natukob na sa mga negosyante.

Sa 71 ka pribadong water districts, nahibaw-an ni Rudy Aranjuez, nasudnong presidente sa Water System Employees Response (WATER), 42 ang gipanag-iya sa Prime Water, kompaniya ni kanhi senador Manny Villar, kansang anak nga si Mark Villar maoy kalihim sa Department of Public Works and Highways nga, nakatag-an ka, maoy nag-regulate sa industriya sa tubig.

* * *

Gawas sa mga Villar, giila sa water districts ang mosunod nga higante nga mga negosyante nga hagbay rang naglaway sa pagbanos sa ilang operasyon sa nagkalainlaing bahin sa nasud:

• Metro Pacific Investments Corp. (MPIC) ni Manny Pangilinan nga maoy nanag-iya sa Maynilad Water Services;

• Manila Water Company Inc. (MWC) ug Manila Water Philippine Ventures (MWPV) nga gipanag-iya sa Ayala Corp.; ug

• Filinvest Hitachi Omni Waterworks (Flow) sa Filinvest Development Corp. ug Hitachi Aqua-Tech Engineering Pte. Ltd.;

* * *

Ubang mga negosyante nga niburot sa pagbanos sa pamunoan ni Presidente Rodrigo Duterte gikatahong nagpanilap sab sa dakong kita sa negosyo sa tubig. Ang Udenna Development Corp. ni Dennis Uy sa Davao nga giingong labing suod sa presidente mao nay tag-iya sa Philippine H2O Ventures Corp.

Kining kompaniya nga napalit ni Uy niadtong 2017 maoy gitumbok nga labing interesado sa MCWD ug ni-apura sa usa ka senador ug iyang sinaligan sa Sugbo pagsugo sa lokal nga mga opisyal pagtay-og sa MCWD.

* * *

May sukaranan ang WATER ug mga kawani sa water districts sa pagkuwestiyon sa paspas nga pagkontrolar sa industriya sa tubig sa mga negosyante nga suod sa administrasyon. Kay kasagaran kon di man tanang water districts nga na-privatize nipasaka dayon sa bayranan sa tubig ug nitaktak o nihimong kontraktuwal sa mga kawani.

Hinaot nga nakasabot si Cebu City Mayor Edgar Labella sa tinuoray’ng mga implikasyon sa iyang paglahugay sa MCWD. Kay kon simbako mosulbong ang bayranan apan magpabiling nihit ang tubig nahibawo nang mga Sugbuanon kinsay angay’ng tulisukon.

METRO CEBU WATER DISTRICT
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with