Gamayng milagro sa MCWD

Lisod tuohan nga nagkadungan og kapugwat ang lokal nga mga opisyal sa Metro Cebu sa kakuwang sa tubig dayong tapos sa niaging buwan. Mas lisod dawaton nga naatol lang nga sunudsunod nga gipasar ang mga resolusyon sa mga konsehal sa mga dakbayan ug kalungsoran ug board members sa Kapitolyo nga nitulisok sa Metro Cebu Water District (MCWD) nga maoy labing dakong sad-an.

Ang mosunod maoy nahibaw-ang mga petsa sa mga resolusyon: Consolacion, Septiyembre 18; Kapitolyo ug Mandaue, Septiyembre 23; Cebu City, Septiyembre 24; Liloan, Septiyembre 25; Cordova ug Lapu-Lapu, Septiyembre 26.

* * *

Mahimong nagtigom sa tago ang lokal nga mga opisyal ug samtang nagtuki sa kumon nga mga suliran ug mga panginahanglan sa mga molupyo ug kalit nga nisantop sa tanan nilang hunahuna nga ang pagpalagpot lang sa mga sakop sa Board of Directors sa MCWD ang makasulbad sa krisis sa tubig.

Lisod abuton ang lokal nga mga opisyal, nga pulos hawod sa ilang tagsa-tagsa ka teritoryo, ug labaw nang lisod abuton ang ilang panghunahuna. Maong may sukaranan ang mga pagduda nga igo lang niyango sa opisyal nga labaw nilang tanan.

* * *

Imposible na gyong ipasabot nga lain na sang tsamba nga pagka Septiyembre 30, pila lang ka adlaw human napasar ang nagpusot-pusot nga mga resolusyon ug usa ka adlaw sa wa pa maminaw ang mga sakop sa Cebu City Council sa katin-awan sa taga MCWD, nisuwat si Cebu City Mayor Edgar Labella sa Local Water Utilities Administration (LWUA) pagpangayo og pagtugot pagtaktak sa mga tagduma sa MCWD.

Ang nisunod nga panghitabo, pasayloan lang unta ta sa bag-o lang nag-piyesta nga si Sta. Teresa de Avila, mora na gyong milagro.

* * *

Pagka Oktubre 1, usa ka adlaw human gipada ni Labella ang suwat, nga morang duna nay nag-atang daan ug nag-andam na og tubag sa ulohang buhatan sa LWUA sa Quezon City, gitugotan dayon ni LWUA Acting Administrator Jeci Lapus ang pagtaktak nilang MCWD Chairman Joel Mari Yu ug kaubanan.

Mahimong may direkta silang linya sa langit maong nag-ambahan ang tanang anghel pagpahimutang sa tanang lakang nilang Labella ug kaubanan. O may bag-o silang ginoo sa Sugbo nga di magpabalibad bisan unsay iyang gusto.