Mas makadaut kay sa kagaw
Usa sa mga kabalaka sa unang mga adlaw sa pag-ban sa tanang buhi, karne ug mga produkto nga baboy gikan sa Luzon mao nga mahimong magkuwang ang suplay sa Sugbo. Apan human sa pila ka semana, nipahibawo ang lokal nga mga opisyal nga wa mahitabo ang kakuwang tungod sa pagtidlom sa demanda.
Karong semanaha, nitumaw nga mas daghan ang wa na mamalit og baboy kay sa gipaabot. Nitiyabaw ang mga mamaligyaay nga nigamay ang ilang halin maong napugos sila og laslas sa ilang presyo hangtod sa P40 matag kilo.
* * *
Naluya ang konsumo sa baboy bisan sa pila ka higayon nga pagpakita sa kadasig sa mga politiko ug mga negosyante pagkaon og lechon ug ubang putahe sa baboy atubangan sa publiko.
Kini tungod kay ang ilang sulti nga luwas kan-on ang baboy bisan sa hulga sa African Swine Fever (ASF) natabonan sa ilang agresibong pagsakmit sa tanang produktong baboy gikan sa Luzon ug kanasuran nga natakdan sa ASF. Ang mas gamhanang mensahe nga niabot sa katawhan mao nga kuyaw ang ASF ug busa nganong mosugal man sila sa pagkaon og baboy?
* * *
Labihan kabangis sa kagaw sa ASF batok sa mga baboy nga mapuo ang mga baboyan sud lang sa duha ngadto sa tulo ka adlaw. Apan di makadaot ang kagaw sa tawo ug bisan sa mga baka, kanding, manok, itik ug ubang kahayopan.
Sa ato pa, ang epektibong kampanya mao gyod unta ang paglimpiyo sa mga baboyan, sa mga sakyanang gikargahan sa mga baboy ug pag-edukar sa mga namuhi og mga baboy sa di pagpakaon og lamaw nga mahimong nasagolan og karneng baboy nga may ASF.
* * *
Apan ang pagpalambo sa biosecurity sa mga baboyan ug paghatag og tabang sa gagmayng mga mag-uuma aron nga di na magdaginot sa pagsagol og lamaw sa ilang mga lawog sa baboy di sama kamadanihon sa pagsakmit sa mga karneng baboy gikan sa mga pasahero sa mga pantalan ug tugpahanan.
Mao nga samtang luwas pa sa ASF ang Sugbo, nagping-it nang gagmayng mamaligyaay sa kamerkadohan nga di maka-utong sama sa dagkong mga negosyante. Daghang salamat sa pataka nga sulbad sa mga politiko nga mas makadaot pa kay sa kagaw.
- Latest
