Labing nalipay sa ban sa baboy
Labing nalipay sa hingpit nga ban sa Sugbo ug ubang lalawigan sa tanang produkto sa baboy gikan sa Luzon mao ang lokal nga mga negosyante og baboy. Kay wa nay kumpetinsiya ang ilang mga produkto samtang nagkaduol nang pasko ug bag-ong tuig. Kanus-a mas daghan og kuwarta ang mga konsumidor, labi nang mga kawani nga makadawat sa ilang 13th month pay ug bonus, nga ipamalit og karneng baboy ug ubang pagkaon.
Nidason sila nga mao ni labing epektibong paagi pagpabiling luwas sa Sugbo ug Central Visayas gikan sa African Swine Fever (ASF).
* * *
Tungod sa ban, nga gitakda ra og 100 ka adlaw apan mahimong molungtad hangtod sa sunod tuig, napapas ang dagkong bentaha sa mga pabrika sa mga produktong baboy sa Metro Manila sama sa mas lapad nga sistema sa pag-apud-apod ug mas dagkong budget sa marketing ug advertising.
Samtang niangkon nga kuwangon ang ilang suplay sa karneng baboy sa Sugbo ug kasilinganang lalawigan alang sa kinatibuk-ang panginahanglan sa mga konsumidor, nipasalig sila nga takos nga makatapak sa kakuwang ang mga baboyan sa ubang bahin sa Kabisay-an ug Mindanao.
* * *
Gisalikway sa mga baboyan sa Sugbo ang pasidaan sa Philippine Association of Meat Processors Inc. (PAMPI) nga magnihit ang suplay sa ham sa Sugbo ug Kabisay-an ug Mindanao kay matanggong ang kasagaran sa ilang suplay sa Luzon kay gimenosan ang ilang produksiyon ug ang ham sa ilang mga planta sa Metro Manila di mapada sa Sugbo.
Matod sa lokal nga mga negosyante og baboy mas ganahan ang mga Sugbuanon sa lechon baboy kay sa ham ug ubang mga produkto sa baboy nga himalitan sa Luzon.
* * *
Niangkon hinuon sila nga ang tinuod nga kapuslanan sa ban maong paglangay sa ASF sa Sugbo, Kabisay-an ug Mindanao. Nagduda sila nga mas katap nang ASF sa Luzon kay sa giangkon ni Agriculture Secretary William Dar ug busa dakong kahigayonan nga matakdan ang tibuok nasud.
Nabalaka ang lokal nga mga negosyante og baboy nga ang lapad nga pangurakot sa Bureau of Customs (BOC), Bureau of Animal Industry (BAI) ug ubang ahensiya sa gobyerno maoy mohatod sa ASF ug mopuo sab sa mga baboy sa atong kaugalingong nataran.
- Latest
