^

Kasinatian sa kanihit sa tubig

ARANGKADA - Leo Lastimosa (The Freeman) - October 6, 2019 - 12:00am

Una kong nakamatngon og kanihit sa tubig kapin sa upat ka dekada ang nilabay samtang nagpuyo mi sa Davao City. Way tubo sa tubig nga nagsumpay sa kabalayan. Hingpit nga nagsalig ang mga molupyo sa mga tangke sa tubig nga gisudlan sa uwan nga nasawod sa mga sandayong.

Uwan ang among giinom, gikaligo, giluto sa among pagkaon, gihugas sa mga plato ug sa ubang inadlaw nga mga panginahanglan. Wa mi suliran sa mga buwan nga tinguwan. Apan atol sa ting-init napugos mi sa pagpangita og alternatibo nga mga tinubdan sa tubig.

***

Labing sinaligang alternatibo sa uwan mao ang suba sa Davao. Nga direktang gidad-an sa mga labhunon ug gikawosan alang sa mga pansayan. Apan di luwas alang sa pag-inom ug pagluto sa pagkaon.

Aron makuha ang mga hugaw sa suba, nagkawot mi og lawom nga mga lungag sa bas pila ka dupa gikan sa tampi. Ang nitubod nga tubig gihinay-hinayan namo sa paglimas, gisud sa mga balde, gihakot padung sa among bay nga nahimutang pipila ka kilometro gikan sa suba ug gibutang sa dagkong banga nga maoy tinubdan sa pag-inom ug pagluto.

***

Mahimong may water system na ang kinapusoran sa Davao niadtong higayona. Apan wa kaabot sa amo. Kay nagpuyo mi sa isla sa Batalyon (gikan ang ngan sa usa ka batalyon sa mga Hapones nga giingong napatay sa isla sa ikaduhang gubat sa kalibotan) nga gihiwa sa higanteng suba gikan sa mainland.

Apan maayong sundon dinhi sa ato ang naandan sa taga Davao nga pagsawod sa uwan sa kabalayan. May naumol nang ordinansa alang sa mga bay patigayon apan pipila ra ang nituman.

***

Manghinaot sab ko nga, lahi sa Sugbo, Bohol ug kasilingang mga lalawigan sa Kabisay-an, normal na ang tinguwan sa Davao. Aron nga di na mapugos ang mga molupyo sa mga dapit sama sa isla sa Batalyon sa pagpangita og alternatibong mga tinubdan sa tubig.

Kay nakakita ang Department of Health og kagaw sa polio sa suba sa Davao. Maong nisugo gilayon si Mayor Sara Duterte Carpio ug ubang lokal nga mga opisyal nga di na pakaligoan. Ug mahimong di na sab luwas ang paglungag sa bas aron limasan og tubig mainom.

leo_lastimosa@abs-cbn.com

WATER CRISIS
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with