DOTr abunda sa pagarpar
Human nibaraw sa pagpadayon sa nasugdan na unta nga pagpatuman sa P16 bilyones nga Bus Rapid Transit (BRT) sa Cebu City niadtong 2016, ug usa ka tuig human niawhag sa National Economic and Development Authority (NEDA) sa pagbasura sa proyekto niadtong 2018, nikalit lang og balitok ang kadagkoan sa Department of Transportation (DOTr), nihangop na sa BRT ug niluwat sa mosunod nga mga pasalig:
•Masugdan na ang pagtrabaho sa BRT karong Disyembre;
•Magamit na ang BRT sa di pa ang Disyembre 2021; ug
•Palapdan ang BRT hangtod sa Talisay City.
***
Apan dihang nangutana si Kongresista Raul del Mar kon ang dagkong kausaban sa BRT nakadawat na ba og pagtugot gikan sa Investment Coordination Committee sa NEDA, International Bank for Reconstruction and Development sa World Bank, Clean Technology Fund, ug sa Agence Francaise de Developpement, nitak-om na silang Transportation Secretary Arthur Tugade ug kaubanan.
Igo lang nipasalig nga ang BRT kabahin sa Integrated Intermodal Transportation System (IITS) sa Metro Cebu nga maglakip sa monorail ug cable car nga segun ni Tugade magamit na sa kataposang quarter sa 2021.
***
Kuyawan ko ning way tihik-tihik nga pasalig nilang Tugade tungod sa laksot nilang track record sa pasalig pagsulbad sa nagbuntaog nga problema sa trapiko sa Metro Manila, Metro Cebu, ug ubang sentro sa pupulasyon. Nabawo sa ilang gipangayo nga emergency power kay:
•Wa kapasabot sa mga senador ug mga kongresista unsa ang dugang gahom nga ilang gikinahanglan; ug
•Wa kapakita og plano unsaon sa paghapsay sa dagan sa mga sakyanan sa kadalanan.
***
Mas gikuyawan ko dihang nabisto ang kataphaw sa ilang plano sa Public Utility Vehicle Modernization. Dayong tapos sa tulo ka tuig nga transition period, 3% pay ilang napadagan sa modernong mga sakyanan nga ipuli sa 170,000 ka Public Utility Jeepneys nga 15 anyos pataas.
Dihang gipangutana kanus-a mahingpit ang 97% nga kuwang, nangayo ang DOTr og laing tulo ka tuig. Sa ato pa, hangtod sa 2023. Kanus-a wa na sila sa puwesto kay mapupos na mang termino ni Presidente Rodrigo Duterte sa 2022. Gipahinumdoman sila sa mga senador nga ang gipangayo nilang gahin alang sa PUV modernization kutob ra sa 2022.
- Latest
