Kurog sa pribadong sakyanan
ARANGKADA - Leo Lastimosa (The Freeman) - August 20, 2019 - 12:00am

Ang mosunod mao ang pait nga mga numero nga angay nga atubangon sa bisan unsa nga seryuso nga pagsuway sa pagpatulin sa nagkamang karon nga pag-irog sa mga sakyanan sa labing naghuot nga kadalanan sa mga dakbayan ug kalungsoran sa Sugbo:

• Ang mga sakyanan nga pamasahero nga mao’y gisakyan sa 70 porsiyento sa atong katawhan gigahinan lang og 20 porsiyento sa luna sa kadalanan; ug

• Ang mas dako nga 80 porsiyento sa luna sa kadalanan giangkon sa pribado nga mga sakyanan nga gisakyan sa 30 porsiyento lang sa katawhan.

* * *

Pinasikad sa mga numero sa ibabaw ang labing laktod nga sulbad sa pagkabara sa trapiko sa Sugbo ug ubang sentro sa populasyon sa nasud mao ang pag-iban sa gidaghanon sa pribado nga mga sakyanan ug pagdasig sa katawhan sa pagsalig sa mga sakyanan nga pamasahero.

Apan di kasaligan ang atong mga sakyanan nga pamasahero. Nga gidominahan sa karaan ug kagang-kagang nga public utility jeepneys (PUJs) nga kon di ka magyaka kay hapit na motupong sa sawog ang mga lingkoranan mapul-an sab ka og duko aron di mosangko ang imong ulo sa atop.

* * *

Inay hingusgan ang pagpalambo sa mass transport system sa buses ug mga tren, nga sa ubang kanasuran mao’y nakakumbinser sa mga motorista sa pagtahan sa ilang pribadong mga sakyanan, nilikoy ang Department of Transportation (DOTr).

Giduso na hinuon ang bag-ong jeepneys (nga mas dako lang og diyutay sa karaang PUJs) ug transport network vehicle services (TNVS) nga gi-monopoliya sa Grab ug sama sa pribadong mga sakyanan duna ray duha o tulo ka pasahero.

* * *

Sa pagpahapsay sa kadalanan mas sayon ang pagtulisok sa kakuwang og disiplina sa mga drayber sa PUJs nga way higala nga mga politiko, bahala na nga nagbuntaog ang mga ebidensiya nga ang padayong pagsulbong sa gidaghanon sa mga sakyanan mao’y nakapa-ungot sa di na mapalapdan nga kadalanan.

Mas lisod ang paghigpit sa pribadong mga sakyanan --apil nang pagtakda pilay kinadaghanang sakyanan nga maangkon sa usa ka pamilya, pagdili sa pribadong mga sakyanan sa labing huot nga kadalanan ug pagpausbaw sa buhis sa pagpamalit sa bag-ong mga sakyanan-- sa adunahan nga mga negosyante nga dako og amot sa mga kampanya sa mga politiko.

PUBLIC UTILITY JEEPNEYS
Philstar
  • Latest
Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with