Mga problema sa UHCA
Padayon pa nga giumol ang mga lagda sa pagpatuman sa labing mahinungdanon nga balaod nga naumol sa niaging Kongreso --ang Universal Health Care Act (UHCA)-- nga molibre sa bayranan sa tanan nga batakan nga pangalagad nga medikal alang sa tanan nga Pilipinhon.
Gihatagan ang Department of Health (DOH) ug ubang buhatan sa gobyerno og hangtod karong buwana, unom ka buwan human pirmahi ang balaod niadtong Pebrero ning tuiga, sa paghingpit sa implementing rules and regulations sa Republic Act 11223.
* * *
Labing dakong kausaban nga mahitabo sa hingpit nang pagpatuman sa UHCA sugod sa sunod tuig mao nga si bisan kinsa, labi na ang labing kabos nga mga pasyente, mahimo na nga magpatambal nga libre sa mga ospital nga gipanag-iya sa gobyerno ug pribadong mga kompaniya.
Karon ang mga kabos nga hilantan, tungod sa kabalaka sa kamahal sa pagpatambal moinom lang og tubig ug mopahuway. Sugod sa Enero 1, 2020 ang tanang mabalaka sa kalabad sa ilang ulo makapahiling na sa mga ospital, mahimong hatagan og kuwarto ug higdaanan kon may makitang mas seryusong kakulian, nga di kinahanglang mobayad bisan usa ka dako.
* * *
Mao’ng karon pa lang angay untang ang gobyerno magtukod na og dugang mga tambalanan. Kay kon naghuot nang mga pasyente karon unsa na kaha kon mapilu-pilo sila sa makadaghang higayon tungod sa UHCA.
Kon pasikaran ang morang umang nga pagtukod sa mga eskuylahan ug ubang proyekto sa gobyerno, manguros na lang tang daan kon kanus-a pa mahuman ang pagtukod sa bag-ong mga tambalanan di lang sa dagkong dakbayan kon dili ug labi na sa lagyong kalungsoran.
* * *
Laing suliran mao ang kakuwang sa nurses. Tungod sa kagamay sa suholan, nagpanon ang atong nurses sa pagpanrabaho sa ubang kanasuran. Maong napugos nang mga tambalanan pagtak-op sa ilang mga kuwarto ug gipasangil lang nagsugwak ang mga pasyente.
Laing suliran, ug mahimong mao’y labing seryuso, mao ang kakurakot sa Philippine Health Insurance Corp. (PhilHealth). Kon nagkayamukat na karon nga pipila pa lang ang ilang mga sakop unsa na kaha kon ang tanan nang Pilipinhon ang kinahanglan nila nga alagaran ug sila nay tugyanan sa P254 bilyones nga igahin sa unang tuig sa pagpatuman sa UHCA?
- Latest
