Nahinaykan nang pagtalaw
ARANGKADA - Leo Lastimosa (The Freeman) - August 8, 2019 - 12:00am

Ambot seryuso ba o nagpa-ukyab lang si Presidente Rodrigo Duterte sa iyang pahibawo nga sa pagduaw sa China karong buwana tukion na niya uban ni President Xi Jinping ang kadaogan sa Pilipinas batok sa pangangkon sa China sa tibuok South China Sea (SCS) sa Permanent Court of Arbitration (PCA) sa The Hague niadtong 2016.

Di mabasol ang katawhan nga di dayon motuo. Kay way garantiya nga ang saad di mahisama sa panumpa sa nangampanya pa sa pagka presidente nga mag-jet ski siya paingon sa Spratlys aron pagtanom sa bandila sa Pilipinas.

***

Ang kalit nga pagpangisog sa presidente batok sa China nakahatag og lab-as nga sukaranan sa pagtuo nga, sukwahi sa iyang mga pangangkon, kanunay siyang nagtamod sa sentimento sa kinabag-an sa katawhan. Nga sa kina-uwahiang survey kusganong nisupak sa pagpanghasi sa China sa West Philippine Sea (WPS).

Maong gawas sa saad nga mangisog sa sunod nilang panagsulti ni Xi, giaprobahan sa presidente ang sugyot ni Foreign Affairs Secretary Teddy Boy Locsin nga tamlaan sa mapa sa Pilipinas nga maglakip sa WPS sa pasaporte sa China nga may mapa sa tibuok SCS.

***

May sukaranan hinuong pagduda nga ang pangisog sa presidente nanukad sa mas agresibong baruganan sa Armed Forces of the Philippines (AFP) batok sa China:

Gitumbok ni Defense Secretary Delfin Lorenzana nga nagsugod ang tensiyon sa WPS tungod sa pag-ilog sa China sa Scarborough Shoal niadtong 2012;

Gideklarar ni National Security Adviser Hermogenes Esperon nga hulga ang kalit nga pagdagsa sa mainland Chinese; ug

Gitambagan sa AFP ang presidente pagsalikway sa plano sa China pagkontrolar sa tulo ka isla sa Luzon nga mahinungdanon sa nasudnong seguridad.

***

Wa pa hinuoy klaro unsay labing mahinungdanong tuyo sa presidente sa ikalima niyang pagduaw sa China: Pag-awhag ba ni Xi pagtahud sa kadaogan sa Pilipinas sa The Hague; o pagtan-aw lang og basketbol sa Gilas Pilipinas.

Kon tinud-on ang pasalig nga mangisog na, unsaon man pagbakwi ang hingpit niyang pagtahan, apil nang kuwestiyonable nga pagpangutang sa China, pagtugot sa ilegal nga Chinese workers, pagpahiyos sa pagbangga sa barko sa China sa bangka sa Pilipinhong mga mangingisda ug pag-insistir nga inutil ta kon mosukol sa China?

leo_lastimosa@abs-cbn.com

PERMANENT COURT OF ARBITRATION SOUTH CHINA SEA XI JINPING
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with