Mga misteryo sa dengue
Bisan sa gideklarar sa Department of Health (DOH) nga nasudnong pangandam batok sa dengue ug bisan sa awhag ngadto sa mga molupyo ug lokal nga mga opisyal sa pagpakabana batok sa dengue, padayon ang pagsulbong sa mga kaso sa makamatay nga sakit.
Sud lang sa usa ka semana --gikan sa Hunyo 30 hangtod sa Hulyo 6-- naka-ihap ang DOH og dugang 5,744 ka bag-ong mga kaso. Niabot na og 491 ang nangamatay tungod sa dengue sukad sa Enero 1 ning tuiga. May 115,986 na ka kaso sa tibuok nasud, hapit na madoble ang 62,267 ka kaso sa sama’ng higayon sa niaging tuig.
* * *
Samtang gipasalig sa DOH Central Visayas nga di pa ika-alarma ang mga kaso sa dengue sa Sugbo, Bohol, Negros Oriental, ug Siquijor, ang atong rehiyon nakadugang og 9,259 ka kaso, ikalima nga labing daghan sa tanang rehiyon sa nasud, sa unang semana ning buwana.
Nagpabilin nga kinadaghanan og kaso ang atong silingan nga Western Visayas (15,826), gisundan sa Calabarzon (12,780), Socsargen (9,572) ug Northern Mindanao (9,354). Mga bata nga 5 ngadto sa 9 anyos mao gihapon ang kasagarang nabiktima.
* * *
Samang wa pay giila sa World Health Organization nga tambal sa dengue (gi-ban ang Dengvaxia sa Pilipinas apan gitugotan na sa ubang kanasuran), wa say katin-awan sa misteryusong pagsulbong ug pagtidlom sa dengue matag duha ngadto sa tulo ka tuig.
May pangagpas ang kanhi health officer sa Mandaue: Mosakang dengue kay wa manlimpiyo ang mga molupyo sa palibot; tungod sa kadaghan sa na-ospital ug namatay, nanlimpiyo sila busa mo-us-os pagka sunod tuig; ug kay ni-menos mang mga kaso, magtapol sa pagpanlimpiyo maong mosaka na sab pagka sunod tuig.
* * *
May laing katin-awan ang mga eksperto sa dengue sa ubang kanasuran:
• Una, tungod sa limitadong immune system sa mga biktima kay ang ilang immunity sa usa ka strain di man makasagang sa laing tulo ka strain sa dengue; ug
• Ikaduha, ang talagsaong katakos sa kagaw sa dengue nga ang unang infection inay mosagang mopasamot hinuon sa epekto sa ikaduhang infection, gitawag og antibody-dependent enhancement o original antigenic sin, nga maoy epekto sa dengvaxia nga gibakuna sa mga wa pa sukad matapti og dengue.
- Latest
