Nangluod sa veto
ARANGKADA - Leo Lastimosa (The Freeman) - May 22, 2019 - 12:00am

Kon di na mapasar ang balaudnon nga mopausbaw sa buhis sa bino ug sigarilyo sa nahibilin nga tulo ka semana nga sesyon sa Senado ug House of Representatives, ang mga abogado sa buhatan ni Presidente Rodrigo Duterte ang matulisok.

Nga dakong trahedya. Kay ang dakong kantidad nga matigom sa gisugyot nga P60 nga buhis sa matag kaha sa sigarilyo ug P40 nga buhis sa matag litro sa bino mao ang gamiton sa pagpatuman sa Universal Health Care Law nga gipasalig nga molibre sa tanang gastohan sa ospital sa tanang Pilipinhon.

***

Ang nag-una sa mga balibad sa mga senador ug mga kongresista mao ang kakuwang sa panahon sa di pa mapupos ang termino sa mayoriya nila. Taas nga paminawon ang tulo ka semana nga nahibilin apan ang tinuod mao nga siyam ka adlaw ra ang ilang sesyon.

Kay kon wa pang kabantay, usa sa labing dakong pribilihiyo sa mga sakop sa Kongreso mao nga mas taas ang ilang bakasyon kay sa trabaho. Sa usa ka semana, tulo ka adlaw ra ang ilang sesyon ug upat ka adlaw ang ilang bakasyon.

***

Apan ang posibleng tinuod nga hinungdan nganong wa mag-apura ang mga magbabalaod sa dugang buhis nga giduso sa Malakanyang mao ang gikumpisal nilang Senate President Tito Sotto ug Majority Leader Migz Zubiri nga pagpanluod sa mayoriya sa mga senador.

Matod ni Zubiri lisod sabton nga ang walo ka balaudnon nga gihagoan sa pagpanday gi-veto ni Presidente Duterte sa tumang kasayon bisan kon ang maong mga sugyot naggikan sa economic managers nga gipangulohan ni Finance Secretary Sonny Dominguez.

***

Ang posibleng katin-awan ini mao ang panagang ni Kalihim Adie Sitoy sa Presidential Legislative Liaison Office matag higayon nga basulon siya sa mga magbabalaod sa veto sa presidente:

•Gipanday sa Kongreso ang mga balaudnon pinaagi sa pagkonsulta sa mga sakop sa gabinete uban ang pagtuo nga giuyonan sa presidente;

•Atol sa pagtuki sa mga balaudnon di motingog ang presidente kay di ganahan nga makautang og kabubut-on sa taga Kongreso; apan

•Inigpada na sa mga balaudnon sa Malakanyang alang sa pirma sa presidente, ayha pa moapil pagsubli ang mga abogado sa Malakanyang nga way labot sa sinugdanan sa proseso.

leo_lastimosa@abs-cbn.com

RODRIGO DUTERTE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with