Boto sa Simbahan
Usa sa mga politiko sa Dakbayan sa Sugbo nga gipaluyohan sa Iglesia ni Cristo (INC) sa piniliay niadtong Lunes niingon nga ang disiplina sa relihiyusong kahugpongan maoy nakapadaog nilang Bise Mayor Edgar Labella ug kanhi Mayor Mike Rama batok nilang Mayor Tommy Osmeña ug Konsehal Mary Ann Delos Santos.
Gikuwenta niya ang suporta nga modoble sa epekto sa gibanabana nga 20,000 ka botanteng sakop sa INC sa Cebu City: Mapun-an og 20,000 ka boto ang mga gisuportahan ug makuhaan og 20,000 ka boto ang mga wa suportahi.
* * *
Nangagpas siya nga ang samang suporta sa INC mahimo nga maoy nakapadaog nilang Osmeña ug Labella sa piniliay niadtong 2016 batok sa wa suportahi nga silang Rama (nga maoy nidagan pagka mayor batok ni Osmeña) ug Konsehal Nestor Archival (nga maoy nidagan pagka bise mayor batok ni Labella).
Apan way makatino kinsay aktuwal nga gibotaran sa mga sakop sa INC. Kay ang mga lagda sa Commission on Elections (Comelec) nagdili ni bisan kinsa sa paglili, paghulagway, o bisan pagpaluta sa mga marka sa mga balota sa mga botante, bisan unsay ilang relihiyon.
* * *
Maong sa di pa ta mangluhod ug mag-ambahan sa kadagkoan sa INC nga maoy ang tinuod nga magbuot kinsay mapili sa labing mahinungdanon nga mga buhatan sa lokal ug nasudnong gobyerno, niang pipila sa gipaluyohan sa INC nga napilde:
• Silang Gerard Carillo, Bob Cabarrubias, ug Jerry Guardo (nidaog ang wa suportahi sa INC nga silang Joy Young, Junjun Osmeña ug Phillip Zafra); ug
• Sa Dakbayan sa Lapu-Lapu, silang Boy Radaza ug Harry Radaza gipilde sa wa suportahi nga silang Ahong Chan ug Dr. Celsi Sitoy.
* * *
Samtang nagdumili ang kadagkoan sa mas dako nga Simbahang Katoliko sa paghingan sa mga ngan sa mga politiko nga angayng botaran, kay kutob ra sa mga pasumbingay pagpili sa mga takos ug ligdong ug pagsalikway sa mga kawatan ug mapahimuslanon, ang kadagkoan sa INC way panagana nga pagsangyaw kinsay ilang botaran ug pag-angkon og kredito pagtabang sa mga mananaog.
Maong gigantihan ang ilang kadagkoan sa gamhanang mga puwesto sa gobyerno. Samtang ang atong kaparian padayon pang naglalis duna bay, o angay bang palihukon, ang Catholic Vote.
- Latest
