Pagbudhi sa mga mag-uuma
Di ning kaambas sa mabudhion nga hawok ni Hudas kang Hesukristo sa Semana Santa, apan makalilisang ni nga tampok sa bukubuko sa mga mag-uuma nga gipasaligan nga may igahin nga tinuig nga hinabang alang nila nga maoy direkta nga maligsan sa mas gawasnon nang pagpangompra og bugas humay gikan sa ubang kanasuran.
Gisaaran ang mga mag-uuma og P10 bilyones nga Rice Competitiveness Enhancement Fund (RCEF) gikan sa buhis sa imported nga commercial rice. Apan nikumpisal ang National Economic and Development Authority (NEDA) nga way kuwartang gigahin alang sa RCEF karong tuiga.
* * *
Sa di pa siya mabalikasan sa mga mag-uuma, nidalidali og pasalig si Agriculture Secretary Manny Piñol nga ang P10 bilyones nga RCEF naapil sa nasudnong budget karong tuiga, nga nalangay sa pagpanday tungod sa panagsungi sa mga senador ug mga kongresista.
Kon pirmahan ni Presidente Rodrigo Duterte ang 2019 General Appropriations Act, naneguro si Piñol nga mapahimuslan na sa mga mag-uuma ang RCEF, nga naglakip sa hinabang sa pagpamalit og mga traktora ug ubang makina sa panguma ug P1 bilyon nga pahuwam, sugod karong Hulyo.
* * *
Apan sukwahi ang kasayuran ni NEDA Assistant Secretary Mercedita Sombilla: May P5 bilyones nga RCEF nga giluwatan sa niaging tuig tungod sa pagtuo nga sayo nga mapasar ang Rice Tarrification Law; apan kay karong tuiga na man napirmahan ang balaod, gigasto ni Piñol ang kuwarta alang sa National Rice Program (NRP).
Sa iyang bahin, nipasabot si Piñol nga ang P5 bilyones nga iyang nadawat gikan sa Department of Budget and Management (DBM) sa Disyembre sa niaging tuig alang sa NRP, di sa RCEF.
* * *
Giawhag ni Piñol ang DBM pagluwat dayon sa P10 bilyones nga RCEF karong napirmahan nang Implementing Rules and Regulations sa balaod ug di na magpaabot sa savings nga mahimong unya pa sa sunod tuig mapuslan.
Palihug tabang og bantay matuman bang pasalig ni Piñol. Kinsa mas daghang pagarpar kay sa kaayuhan nga nahatag sa mga mag-uuma, ang tinuod nga mga bayani sa pagpakaon sa nasud ug katawhan. Kon simbako tinuod ang pasidaan sa NEDA nga way kuwarta sa RCEF karong tuiga, di ni unang higayon nga magpakauwaw ang Malakanyang ug ang Kongreso.
- Latest
