Gikawat ug nagkayamukat
May sukaranan ang mga kabalaka nga ang gipasalig nga P10 bilyones nga hinabang alang sa mga mag-uuma nga maapiki sa hingpit na nga pagpatuman sa Rice Tarrification Law karong tuiga mahisama sa ubang mga hinabang nga gisaad sa pamunoan ni Presidente Rodrigo Duterte sa mga nabiktima sa Tax Reform for Acceleration and Inclusion (TRAIN) Law nga gipatuman sa niaging tuig.
Wa magkadimao ang pagpatuman sa financial assistance sa mga sektor nga naigo sa dugang buhis sa mga produkto sa lana. Unsa may garantiya nga mas hapsay nga mahatag ang hinabang sa mga mag-uuma?
***
Unang gisaaran og tabang dihang gipanday ang TRAIN niadtong 2017 ang labing kabos nga mga pamilya. Nga gikahadlokang maglisod pag-abot sa presyo sa inadlaw nga mga palaliton nga moapil og saka sa pagpahamtang sa excise taxes sa lana.
Unom ka milyon ka pamilya ang gitakda nga hatagan og binuwan nga financial assistance pinaagi sa unconditional cash transfer, puno sa upat ka milyon ka pamilya sa Pantawid Pamilyang Pilipino Program (4Ps). Dugayng nakasugod ang hinabang ug hangtod karon wa pa mahingpit ang listahan sa Department of Social Welfare and Development (DSWD) sa tanang pamilya nga tabanganan.
***
Laing gisaaran og tabang mao ang mga drayber sa public utility jeepneys (PUJs), nga maoy direktang nasugamak sa mas taas nga presyo sa lana tungod sa excise taxes sa TRAIN, pinaagi sa Pantawid Pasada sa Land Transportation Franchising and Regulatory Board (LTFRB) ug Land Bank of the Philippines (LBP).
Natapos na lang ang 2018 wa pang kaabot og katunga sa hinabang ang naluwatan. Ug ang nakadawat mao ang PUJ operators nga ang pipila nagdumili pagtunol sa hinabang ngadto sa ilang mga drayber.
***
Kon wa magkadimao ang DSWD, LTFRB, ug LBP sa pag-apud-apod sa mga hinabang nga gitakda sa TRAIN Law, mas takos kaha ang Department of Agriculture nga mopatuman sa Rice Competitiveness Enhancement Fund?
Kon gipangawat sa mga mayor ug mga kongresista ang P728 milyones nga Fertilizer Fund atol sa pamunoan ni kanhi presidente Gloria Macapagal Arroyo niadtong 2004, unsa may panagang nga di hilabtan sa mga alyado sa administrasyon ang mas dako nga P10 bilyones nga hinabang alang sa mga mag-uuma karon? [email protected]
- Latest
