Way sungay ug way tango
ARANGKADA - Leo Lastimosa (The Freeman) - March 22, 2019 - 12:00am

Tungod sa kabangis sa pagpatay sa 16 anyos nga biktima, kansang patayng lawas nabulit sa 30 ka dinunggaban, gipanitan ang nawong ug giputlan sa dila, ubol-ubol, ug dunggan, ug gidam-ok sa ngiob nga hawan sa Opon, ug sa pasalig sa kapolisan nga lig-on ang ilang mga ebidensiya batok sa mga mamumuno, nakumbinser ang mga Sugbuanon nga:

•Pintas ang mga mamumuno, mahimong mga sakop sa kulto nga mokaon sa ilang biktima; ug

•Kon madakpan na, sayon rang konbiktuhon ug pahamtangan sa kinabug-atang silot, kana kon di mosukol ug laktod nga mapatay.

***

Maong nakabatyag ang kadagkoan sa National Bureau of Investigation (NBI), nga mas hilom kay sa mga polis apan maoy nakadakop sa gipasanginlan nga mamumuno, nga nakuwangan ang publiko sa resulta sa ilang imbestigasyon.

Kay gawas nga way sungay ug tango, ang ilang gikiha 17 anyos nga tinun-an, negatibo sa drug test, nakit-an sa mga silingan nga nag-basketbol dihang giluba ang biktima, ni-eskuyla usa ka adlaw human sa krimen, wa makuhai og makalilisang nga mga hinagiban ug way nasakpan nga mga kauban ni ebidensiya nga direktang molambigit niya sa kasong pagpatay.

***

Apan wa pa mahuman ang NBI. Malampuson nang nasumpay sa ilang mga imbestigador ang footage sa nagkalainlain nga CCTV gikan sa simbahan nga gisilbihan sa biktima ug sa subdivision duol sa hawan diin nabangalan ang iyang lawas sa kasayuran sa mga saksi ug mga mensahe sa social media nga gituohang ila sa biktima ug suspitsado.

Ang pagkasikop sa suspitsado mahimong makadasig sa ubang mga molupyo pagboluntaryo og mas mapuslanong kasayuran nga magamit sa pagpalig-on sa kaso.

***

Masabot ang pagtak-om ang mga imbestigador sa kapolisan. Kalit ra hinuon kaayo ang ilang paghunong sa ilang kaugalingong pakisusi ug sa hingpit nang pagtahan ngadto sa NBI.

May nahipos nga kasayuran ang kapolisan nga klarong nisukwahi sa direksiyon sa imbestigasyon sa NBI. Pananglitan, nipasidaan ang mga polis nga “armado ug peligruso” ang usa sa tulo ka suspitsado, may kasinatian sa seguridad mao nga malampuson nga nalikayan ang tanang CCTV nga ilang naagian gikan sa simbahan sa Pajac hangtod sa hawan sa Bangkal, ug kon madakpan nang usa ka suspitsado dali rang madakpan ang laing duha.

leo_lastimosa@abs-cbn.com

NATIONAL BUREAU OF INVESTIGATION
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with