Nakalangay sa Mananga dam

Andam na ang Metro Cebu Water District (MCWD) sa pagtukod sa Mananga dam nga gipasalig nga makatabang sa pagsulbad sa kanihit sa tubig sa Metro Cebu. Gipasalig ni MCWD Chairman Joel Mari Yu ang dam makatigom og hangtod sa 100,000 cubic meters matag adlaw gikan sa suba sa Mananga.

Matod ni Yu andam na ang kuwarta ug nagpaabot na ang pribadong mga kompaniya nga interesado nga mopatuman sa proyekto. Apan nikumpisal si Yu nga di silang kalihok hangtod nga makalingkod ang mga modaog sa piniliay karong Mayo 13.

* * *

Nagkinahanglan og pagdason sa lokal ug nasudnong politikanhong liderato ang dam, nga nagkinahanglan og dul-an sa dekada sa pagtukod, tungod sa duha ka labing dagko nga komplikasyon:

• Mahimo nga madoble ang bayranan sa mga konsumidor sa tubig sa Metro Cebu gikan sa P29 matag cubic meter (kinabaratohan sa tibuok nasud) karon ngadto na sa P60 matag cubic meter (susama sa presyo sa Metro Manila); ug

• Kinahanglan nga ibalhin ang hangtod 1,000 ka pamilya sa tulo ka barangay duol sa suba sa Mananga nga maapektahan sa pagtukod sa higante nga proyekto.

* * *

Nitug-an si Yu sa Arangkada sa dyAB Abante Pa, Bisaya! nga human makalingkod ang mga mananaog sa piniliay sugod sa udtong tutok karong Hunyo 30, ila dayong duawon ang mapili nga gobernador sa Sugbo, mayor sa Cebu City, ug mayor sa Talisay City.

Sila maoy kinahanglan nga kumbinsihon sa MCWD sa kadinalian ug kamakiangayon sa pagtukod sa dam nga may gitas-on nga 100 ka metro sa luna duol sa utlanan sa Talisay City ug Cebu City.

* * *

Labing lig-on nga mga argumento nga giandam sa MCWD alang sa proyekto:

• Hapit na matilok ang groundwater (nag-rasyon na ganing MCWD tungod sa El Niño) ug busa kuwang na alang sa nagtubo nga populasyon sa Metro Cebu;

• Ang suba sa Mananga maoy kinadul-an nga tinubdan sa surface water kon itandi sa mas layo nga suba sa Lusaran sa bukirang bahin sa Cebu City ug sa busay sa Kawasan sa habagatang lungsod sa Badian; ug

• Mas mahal ang tubig nga gipamalit karon sa mga konsumidor gikan sa water refilling stations ug uban nga pribadong mga kompaniya sa tubig.