Padayong tabon sa mga eskandalo
Ang pagkumpisal ni Arsobispo Antonio Kardinal Tagle nga ang pagdupa sa mga obispo sa mga pari nga nakahimo og pangabusong seksuwal nakahimo og mas dakong samad sa mga biktima sa nagkalainlaing bahin sa kalibotan nitakdo sab sa mga eskandalo sa Atsidyosesis sa Sugbo.
Kasagaran sa mga biktima nagpakahilom tungod sa kauwaw. Ug kaikog sa Simbahan. Ang mga nangahas sa pagtiyabaw wa kaangkon og hustisya. Apil nang bana nga gipalayas sa ilang bay sa iyang asawa nga nakigrelasyon og pari. Ang pari hangtod karon naa pa sa parokya sa habagatang Sugbo.
* * *
Wa hinuoy makalabaw sa makauuwawng pagtabon sa kadagkoan sa artsidyosesis ni Msgr. Cristobal Garcia. Nga gipalagpot sa Dominican Order sa Artsidyosesis sa Los Angeles, California, niadtong 1985 human gipasanginlang nakighilawas og mga bata nga iyang gipanghatagan og cocaine.
Nasakpan sa iyang kura paruko sa St. Dominic Catholic Church sa Eagle Rock nga si Padre Vincent Serpa nga may 17 anyos nga lalaki sa higdaanan ni Garcia. Gikiha sab si Garcia uban sa parokya ug artsidyosesis sa altar boy nga nangangkong giabusohan ug gilawogan og cocaine ni Garcia ug sa laing pari.
* * *
Nisaad si Garcia nga magpatambal dinhi sa Sugbo. Apan way nadawat ang Dominicans nga dokumento nga magmatuod nga nagpatambal si Garcia. Ila na lang nahibaw-an nga nahimo siyang monsinyor ug nagtukod sa Society of the Angel of Peace (SAP) sa Cansojong, Talisay City, nga nanawat og batan-ong mga seminarista.
Nagduda ang mga Dominicans nga ang kaadunahan ug kagamhanan sa pamilyang Garcia maoy hinungdan nga wa masiloti ug mahimo ganing nagpadayon ang iyang pangabuso.
* * *
Wa hinuon matug ang Ginoo. Gihukasan si Garcia sa Vatican sa iyang pagka pari samtang gisusi ang iyang mga pangabuso sa mga bata niadtong Septiyembre 2012. O 27 ka tuig human nalista sa confidential files sa Artsidyosesis sa Los Angeles ang mga pasangil sa posible niyang pagka pedophile.
Nakaaghat sa Vatican pag-utingkay sa kaso ni Garcia mao ang iyang interview sa National Geographic nga nakontrobersiyal kay nisugyot pagpayuhot sa Estados Unidos og ivory nga pinutos og hugawng underwear. Kon nadutlan si Garcia, ubang kaparian sa Sugbo nga nakahimo sab og pangabuso maabtan ra sa adlaw sa panudya.
- Latest
