Higanteng ilad sa Maharlika

Sa dokumentong “Ang Mga Maharlika” nga gisumiter ni anhing presidente Ferdinand Marcos sa mga Amerikanhon human nakalingkawas ang Pilipinas gikan sa Japan niadtong 1945, nangangkon siya nga ang pundok nga iyang gipangulohan maoy labing isog nga nakig-away sa mga Hapones ug maoy responsable sa kalangay sa pagtahan sa Bataan.

Gibanabana ni Marcos ang mga sakop sa Maharlika nga niabot og 300, sa laing dokumento niabot og 8,300, dayon niinsistir nga 8,200 sila ka buok. Nangangkon si Marcos nga duna silay 474 ka armas ug 3,825 ka bala ug nakahatag og kasayuran sa mga Amerikanhon nga nakapahuyang sa mga kaaway.

* * *

Apan napamatud-an sa makuti nga mga imbestigasyon sa US Army nga nilungtad og tulo ka tuig, 1945 ngadto sa 1948, nga way pundok sa mga gerilya nga gitawag og Maharlika nga nakig-away sa mga Hapones gikan sa 1942 hangtod sa 1944. Wa siya ilha nga nakatabang sa gubat.

Wa hinuon ni kapugong ni Marcos sa pag-usab sa ngan sa ABS-CBN Broadcasting Corp. nga iyang giilog gikan sa mga Lopez ngadto sa Maharlika Broadcasting System. Ginganlan sab og Maharlika ang nasudnong highway sa Luzon ug usa ka lawak sa Malakanyang. Nangangkon sab nga maoy labing gipasidunggan nga pangu sa mga gerilya atol sa gubat.

* * *

Nagsugod og duda ang US Army sa pangangkon ni Marcos nga nabuwag siya sa iyang pundok sa Disyembre 1944 kay naabtan sa pag-atake sa mga Amerikanhon sa Luzon maong wa siyay kaagian balik sa Manila.

Segun ni Major Harry McKenzie sa US Army, nagsugod ang pag-atake sa mga Amerikanhon sa Enero 1945 ug busa di mahimong rason sa pagbiya ni Marcos sa iyang pundok. Wa say rekord ang US Army diin gikan ang mga medalya nga gipasigarbo ni Marcos.

* * *

Nakaplagan sab sa US Army nga ang giingong mga sakop sa Maharlika wa makiggubat sa mga Hapones kon dili nagpabilin sa ilang mga panimay ug nanguma. May pipila hinuon ka sakop nga napamatud-an nga nakigkonsabo sa mga Hapones ug nanghasi sa mga sibilyan.

Nahibawo na ta diin liwat ang mga anak ni Marcos, nga namakak hasta sa ilang edukasyon, ug ang nag-idolo niya nga nagpakauwaw pagbanhaw sa higanteng ilad sa Maharlika.