Saka-kanaog sa lana
Ang bisan unsang pahiyom nga nahibilin tungod sa us-os sa presyo sa lana sa niaging semana napapas sa pahibawo sa mas dakong uminto sugod ugma. Karong adlawa pa mohatag ang mga kompaniya sa lana sa tukmang mga numero, apan ang mosunod maoy banabana sa mga eksperto sa industriya sa lana tungod sa pagsulbong sa presyo sa merkado sa kalibotan dayong tapos sa patigayon sa niaging semana:
• Gasolina mosaka og P0.95-P1.05 matag litro;
• Krudo mosaka og P0.55-P0.65 matag litro; ug
• Kerosene mosaka og P0.80-P0.90 matag litro.
* * *
Mas aslom pa g’yud ang dagway sa mga motorista karong semanaha kay madugangan pa g’yud ang gasoline stations nga mopahamtang na sa ikaduhang hugna nga P2 sa excise tax sa matag litro sa krudo ug gasolina ubos sa Tax Reform for Acceleration and Inclusion (TRAIN) Law ni Presidente Rodrigo Duterte.
Maong makaangkon og lab-as nga sukaranan ang pag-apura sa transport groups ngadto sa kadagkoan sa Land Transportation Franchising and Regulatory Board (LTFRB) paghukom sa nag-ung-ong nilang petisyon sa uminto sa minimum nga plitehan sa PUJs sa Sugbo ug Central Visayas.
* * *
Nisaka ang presyo sa lana sa niaging semana tungod sa kabalaka nga motidlom ang suplay sa lana pinasikad sa duha ka kalamboan: Ang paglaslas sa OPEC ug non-OPEC countries sa ilang produksiyon ug ekonomikanhong silot nga gipahamtang sa Estados Unidos batok sa Venezuela nga mohigpit sa industriya sa lana nga maoy tinubdan sa 90% sa nasudnong panudlanan.
Sa pikas nga bahin, may kalamboan sab nga mahimong mobira paubos sa presyo sa lana sa merkado sa kalibotan karong semanaha.
* * *
Nag-una sa mga puwersa nga mahimong mopabarato sa lana mao ang kalayo pa sa kauyonan paghusay sa gubat sa patigayon sa China ug Estados ug ang di paghinayon sa panagtagbo nilang Chinese President Xi Jinping ug US President Donald Trump sa di pa mapupos ang lugway sa sabutsabot karong Marso 2.
Kon mahinayon ang trade war, motidlom ang demanda sa lana tungod sa kaluya sa ekonomiya sa duha ka labing dagkong konsumidor. Di katabang ang pagkaluya sab sa ekonomiya sa ubang kanasuran, apil nang Japan, South Korea ug, ang kinauwahiang naapil sa listahan, Australia.
- Latest
