Mapangahason nga pagsukol
Maniid ta unsay dangatan ni Kongresista Lito Atienza sa iyang pagpangahas pagbadlong ni Presidente Rodrigo Duterte sa iyang pagbinastos, pagbugal-bugal, pagbalikas ug paghudlat sa kaparian ug kadagkoan sa Simbahang Katoliko. Si Atienza di kaatbang kon dili dakong haligi sa administrasyon busa di mahimong diretsuhon lang og tulisok sa presidente.
Apan wa sab mabantog si Presidente Duterte nga mohangop og sukwahi nga mga baruganan. Labi na gyod kon siya ang kurhian. Busa atong atangan unsaon niya pagmakmak si Atienza. O kunsaran sa Espiritu Santo ug mohukom sa paghunong na pagpakauwaw sa simbahan.
***
Si Atienza ang Senior Deputy Minority Leader sa House of Representatives. Nga sa naandan untang kamada sa politiko maoy katungdanan sa ikaduhang labing dakong lider sa oposisyon. Apan si Atienza, sukad pa sa sinugdanan, usa sa labing suod ug sinaligan nga alyado sa presidente.
Salamat sa kamat-an ni kanhi presidente ug karon House Speaker Gloria Macapagal-Arroyo, gawas nga nailog niya ang mayoriya sa kudeta batok ni kanhi Speaker Pantaleon Alvarez, nakontrolar pa gyod ang minoriya pinaagi sa iyang mga sinaligan nga silang House Minority Leader Danilo Suarez ug Atienza.
***
Di ikahibung ang pagpanalipod ni Atienza sa Simbahang Katoliko. Kay representante siya sa party-list group nga Buhay Hayaan Yumabong (Buhay) nga gitukod ni El Shaddai Leader Mike Velarde, nag-unang tigpanalipod sa mga pagtulon-an sa simbahan.
Ang makapahibung mao ang iyang pagbadlong sa presidente sa paghunong na sa pagpahimutang sa peligro sa kaluwas ug kinabuhi sa kaparian. Gipakapinan pa og pasidaan nga sama sa mga nag-una pagsuway mapakyas sab siya sa pagguba sa Simbahang Katoliko.
***
Kay kon wa pa mong kabantay, nagpuyo tang tanan sa kahadlok. Ang mga tagduma sa demokratikanhon nga mga institusyon pulos tak-om tungod sa kabalaka nga maoy isunod nga Senador Leila de Lima nga gibilanggo ug kanhi Chief Justice Ma. Lourdes Sereno nga gi-quo warranto. Labawng nahulga ang kasarangang mga molupyo.
Kasagaran sa mga sakop sa media nagkinto. Bisan ang isog nga mga lider oposisyon naghupu-hupo sa mga kontrobersiya. Hapit tanang politiko nagpingis-pingis sa ilang mga sinultihan. Gawas ni Atienza. Nga gi-grasyahan tingali sa Ginoo. O naabtan na lang gyod sa kinutoban sa taudtaod na uyamot niyang pagpangiyugpos ug pagpakahilom.
- Latest
