Pagpamugos
ARANGKADA - Leo Lastimosa (The Freeman) - December 7, 2018 - 12:00am

Usa sa gikahadlokan ni kanhi kongresista Erin Tañada kinsa niduaw sa Sugbo gahapon mao ang kahigayonan nga makanselar ang lokal ug nasudnong piniliay unya sa Mayo 13, 2019. Atol sa Arangkada sa dyAB Abante Pa, Bisaya! duha ang gihisgutang sukaranan:

•Una, ang pagkara-kara sa mga kongresista sa pagpasar sa balaudnon nga mousab sa 1987 Constitution bisan sa pasidaan sa mga senador nga way cha-cha sa di pang piniliay; ug

•Ikaduha, ang kamingaw sa pagduso sa Bangsamoro Organic Law (BOL) nga kon di magkadimao mahimong mosangpot sa lab-as nga kaguliyang sa Mindanao.

* * *

Nabalaka si Tañada nga di salida ug kiat-kiat lang ang pagpamugos ni House Speaker Gloria Macapagal Arroyo nga maaprobahan g’yud sa mga kongresista ang iyang kaugalingong bersiyon sa bag-ong batakang balaod, bahala na kon gisaway sa mga sakop sa consulative committee ni Presidente Rodrigo Duterte.

Nagduda si Tañada nga gipamatud-an lang ni Arroyo ngadto sa presidente nga naduso sa House ang federalismo bisan sa pagpangiyugpos sa Senado. Busa naa ra sa Malakanyang ang pagpatuman sa cha-cha sa laing paagi, sama pananglit sa pagkanselar sa piniliay ug paglaktaw sa mga senador.

* * *

Gitakda sa Commission on Elections (Comelec) ang plebisito sa BOL unya sa Enero 21, 2019. Apan nahasol si Tañada sa kamingaw sa pangandam sa gobyerno ug sa kakuwang sa atensiyon nga gihatag sa media ug ubang sektor sa katilingban.

Matod ni Tañada kon mapakyas ang BOL, mahimong mabanhaw ang armadong kagubot sa Mindanao. Gawas nga malugwayan ang martial law sa Mindanao, mahimong palapdan sa ubang bahin sa nasud. Kon mahitabo, ang piniliay maoy unang masakripisyo.

* * *

Nipasabot si Tañada nga usa sa iyang nakat-onan sa kapin na sa duha ka tuig nga pamunoan ni Presidente Duterte mao nga di sila managana sa pagdangop sa di kasarangan nga mga paagi sa pagpatuman sa ilang mga plano.

Maong nipasidaan siya nga di imposible nga mohukom si Presidente Duterte sa pagkanselar sa piniliay ug pagpanlaktod sa cha-cha. Bahala na ang iyang mga kaatbang nga maglumba paghagit sa legalidad sa iyang mga lakang atubangan sa Korte Suprema. Kansang mayoriya nimatuod sa makadaghan na uyamot nga higayon nga di mangahas pagsukwahi sa bisan unsay iyang gusto.

leo_lastimosa@abs-cbn.com

ERIN TAñADA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with