Us-os sa presyo ug plitehan
Nadayon g’yud ang gipangagpas nga pag-us-os na sab sa presyo sa lana. Labing menos P2 matag litro ang laslas sa presyo sa krudo ug gasolina dinhi sa Sugbo ug ubang bahin sa Pilipinas. Mao na ni ang ikawalo nga sunudsunod nga semana sa pagtidlom sa presyo sa lana sa merkado sa kalibotan.
Nisunod ni sa siyam ka sunudsunod nga semana sa pagsulbong sa presyo hangtod niadtong Oktubre, kanus-a gikahadlokang moburot ang presyo sa lana ngadto sa $100 matag baril. Sa labing uwahing patigayon, ang lana tag-$58 matag baril na lang.
* * *
Sa makausa pa, naabtikan na sab sa Phoenix Petroleum ang tulo ka higanteng mga kompaniya sa lana sa nasud. Maoy labing una nga nakalaslas sa ilang presyo sugod sa alas-12 sa udto gahapon, Disyembre 1. Gipaabot nga mosunod ang ubang mga kompaniya sa lana sa mosunod nga mga adlaw.
Kon ipasikad sa kapaspas sa paglaslas sa presyo, ang Phoenix nay bag-ong pangu sa industriya sa lana sa Pilipinas. Apan bisan silay labing agresibo, labi na human sa pagbanos ni Presidente Rodrigo Duterte sa Malakanyang, di pa sila maoy kinadak-an.
* * *
Sa labing uwahing taho sa Department of Energy, 53.4% sa industriya pabiling gikontrolar sa tulo ka higanteng kompaniya sa lana: Petron gihapon ang kinadak-an (27%); ikaduha ang Shell (18.5%); ikatulo ang Chevron (7.8%); ikaupat ang Phoenix (7%); ikalima ang Seaoil (4.4%); ug ikaunom ang Unioil (3%).
Nangangkon hinuon ang Phoenix nga sila ang labing paspas nga nipalapad sa ilang operasyon karong tuiga. Sila ang nakapatukod sa labing daghang gasoline stations nga sa labing uwahing ihap niabot na og 558.
* * *
Ang kinatibuk-an nga gidak-on sa us-os sa niaging duha ka buwan labaw pa sa nipapas sa kinatibuk-ang uminto sa presyo sa mga produkto sa lana karong tuiga. Maong nawad-an na og bisan unsang sukaranan ang tanang nag-ung-ong nga mga petisyon sa transport groups sa uminto sa plitehan sa mga sakyanang pamasahero.
Bugtong tukiunon mao na lang nga kanus-a mapatuman ang labing makiangayon nga laslas sa plitehan sa PUJs, taxis, buses, ug tricycles. Ug labing dinalian nga pangutana: Nganong wa pa man motidlom ang presyo sa nag-unang mga palaliton?
- Latest
