Mao diayng nagduka

Way makalalis sa kaisog ug determinasyon ni Presidente Rodrigo Duterte sa pagbadlong sa ilegal nga drugas. Hapit tanan niyang diskurso gidominahan sa mga panghulga ug pasidaan ug pasalig sa paghipos sa tanang durugista sa nasud.

May mga pasalig ug pasidaan sab siya batok sa pangurakot sa nagkalainlaing buhatan sa kagamhanan. Apan wa pa siyay ikapakita, gawas lang sa iyang mga tinudlo nga igo lang gitaktak apan wa kasohi. Lahi sa kaabunda sa iyang agi sa daghan na uyamot nga nangamatay ug nadakpan sa hiningusgang mga operasyon sa kapolisan batok sa ilegal nga drugas.

* * *

Ang pasalig dihang nangampanya pa sa pagka presidente nga masulbad ang problema sa ilegal nga drugas sud lang sa tulo ka buwan hagbay ra hinuon niyang gibakwi. Karon nipasumbingay na nga mahimong di masulbad ang problema bisan human sa pagkapupos sa iyang termino.

Ang iya mismong mga sinaligan sa Philippine Drug Enforcement Agency nikumpisal nga mas nidaghan pang shabu human nalutsi ang Bureau of Customs og P6.4 bilyones nga balor sa shabu sa niaging tuig ug P11 bilyones nga balor sa samang kontrabando karong tuiga.

* * *

Nabisto nga ang kampanya diay ni Presidente Duterte nipuntirya ra diay sa gagmay nga mga mamaligyaay sa shabu sa kadalanan. Wa diay maapil sa iyang plano ang pagtultol ug pagpuhag sa mga tinubdan sa shabu nga mao ang mas dagko nga mga ungo sa ilegal nga drugas.

Ang panglantaw sa presidente way kalainan sa ordinaryo niyang mga polis. Nga natagbaw lang sa pagpatay ug pagsikop sa kanahan nga mga durugista sa ilang presinto. Apan di nang kasabot nganong way hubas-hubas ang shabu.

* * *

Nakapait mao nga nahurot sa kampanya sa ilegal nga drugas ang tanang panahon ug panghunahuna sa presidente. Maong nataligam-an ang ubang mas mahinungdanon pang mga problema sa nasud ug sa katawhan.

Maong hangtod karon wa pa masulbad ang krisis sa bugas humay nga nagsugod sa sinugdanan pa sa tuig. Maong ang lapad nga pangurakot sa gobyerno nisamot pa tungod sa iyang mga tinudlo kansang bugtong puhonan mao ang pagkadestino sa Davao ug pagtabang pagpadaog niya. Maong bisan ang ASEAN ug APEC summits iya lang gikatulgan ug gibugalbugalan.