P27 nga fuel subsidy
Ang gipasiatab pag-ayo sa pamunoan ni Presidente Rodrigo Duterte nga hinabang alang sa mga drayber sa public utility jeepneys (PUJs) nga maoy labing naigo sa pagsulbong sa presyo sa mga produkto sa lana tungod sa excise tax sa Tax Reform for Acceleration and Inclusion (TRAIN) mokabat lang og, palihug panggunit sa imong lingkoranan, P27 matag adlaw.
Wa ka masayop sa imong nabasa. P27 ra matag adlaw ang madawat sa matag PUJ driver gikan sa Pantawid Pasada sa Department of Transportation (DOTr). Di gani kapalit og usa ka litro nga krudo.
***
Mas ngil-ad nga balita: Giangkon sa Land Transportation Franchising and Regulatory Board (LTFRB), nga maoy gitahasan sa DOTr sa pagpanghatag sa fuel subsidy cards, mayoriya sa mga drayber sa Sugbo ug ubang bahin sa Pilipinas wa pa makadawat sa hinabang.
Napu ka buwan human gipahamtang ang dugang buhis sa krudo ug ubang produkto sa lana, wa pa mahitsura ang gamitoy kaayo nga hinabang alang sa PUJ drivers. Kon paundayonan ang binuang nga sistema sa LTFRB, mahimong igo lang nga maglaway ang mga drayber. Kay ang hinabang mahimo rang ibolsa sa PUJ operators.
***
Palihug basaha ug hilaki ning mosunod nga mga numero gikan sa LTFRB:
Sa 12,000 ka PUJs sa Central Visayas, kapin 5,000 pa lang ka cards ang nangabot, nga alang ra sa Sugbo, sa ato pa, wa pay bisan usa ka card nga nahiabot alang sa Bohol, Negros Oriental ug Siquijor; ug
Sa 5,354 ka cards nga nangabot, 1,537 pa ang naapud-apod ngadto sa PUJ operators, sa ato pa, 3,817 o 76% ang natanggong sa LTFRB 7 ug wa kapahimusli.
***
Di pa gyod na mao: Giangkon sa LTFRB nga daghang drayber ang nangreklamo nga ang nadawat na untang fuel subsidy cards gitipigan sa operators ug wa ihatag nila; apan nanghunaw na sila og responsibilidad unsaon pagpadangat ang hinabang ngadto sa mga drayber.
Mao ni sangpotanan sa hinabang nga wa tarunga paghunahuna, mora lang og gikutlo gikan sa tumoy sa buhok sa mga nibunal sa TRAIN Law sa katawhan. Gawas nga labihan nang langaya, wa pa gyod susiha mapahimuslan ba sa kabos nga mga drayber nga maoy tinuod nga gipahinungdan.
- Latest
