COA ang sunod nga puntirya
Kay wa na may bisan usa nga makaseguro, bisan tingali si Presidente Rodrigo Duterte mismo, nagkomedya ba siya o seryuso, angay ‘tang maalarma sa iyang awhag sa lokal nga mga opisyal nga supakon ang mga lagda sa Commission on Audit (COA).
Tungod lang sa pasangil ni Gobernador Imee Marcos sa Ilocos Norte nga gihigpitan sila sa COA sa paggasto sa kuwarta sa Kapitolyo aron pagtabang sa mga biktima sa bagyong Ompong, niawhag dayon ang presidente, uban sa lanog nga abiba ni Marcos, nga ihagbong sa hagdanan ang auditor sa COA.
***
Di sayon ang tahas sa COA. Gawas nga kuti ang ilang trabaho sa pagsubay sa tanang transaksiyon sa tanang ahensiya sa lokal ug nasudnong gobyerno, nahiagom pa g’yud sila sa pagpanghasi sa mga opisyal nga ilang nasakpan nga nakalapas sa mga lagda sa makiangayong paggasto sa buhis sa katawhan.
Nahimong mas lisod ang gimbuhaton sa COA karon nga ang presidente nibalikas sa ilang mga lagda ug nipasalig sa mga politiko nga sila ray magbuot unsaon paggasto ang ilang kuwarta. Way nangahas pagpahinumdom sa presidente nga katawhan ang tag-iya sa kuwarta.
***
Wa hinuoy nakugang nga ang COA ang sunod nga nalingian ni Presidente Duterte. Human hingpit nga nakontrolar ang Kongreso ug ang Korte Suprema, ug human gitay-og ang Commission on Human Rights pinaagi sa panghudlat ug pagbugal-bugal, turno na sab sa COA.
Labi na nga nagsunudsunod ang COA findings sa mga anomaliya sa iyang pamunoan nga napugos ang presidente sa pagtaktak sa labing suod niyang mga opisyal, apil nang pipila ka sakop sa iyang gabinete.
***
Grabe ang dumot ni Marcos sa COA: Sa niaging tuig 2017, nabisto ang binuang niya nga subasta sa lima ka construction contracts ug pataka nga gasto sa P66.45 milyones nga buhis gikan sa tabako; ug niadtong 2012, gibadlong sab ang pagpamalit og tambal ug abuno pinaagi sa cash advances.
Ang presidente mismo wa kalimot sa giisip nga dakong atraso sa COA sa mayor pa siya sa Davao City: Niadtong 2014, gibisto sa COA nga may 11,000 ka kawani sa City Hall nga gisuweldohan og P708 milyones bisan way napakita nga dokumento unsay ilang trabaho.
Related video:
- Latest